Girmek
Şu gün Jemgyýetçilik guramalarynyň merkezinde Türkmenistanyň Ýaşlar baýragynyň gowşurylyş dabarasy geçirildi.
«Altyn asyr» elektron neşiriniň habar bermegine görä, dabaranyň başynda oňa gatnaşyjylar Türkmenistanyň ähli ugurlarda gazanan üstünliklerini, ýeten belent sepgitlerini şöhlelendirýän sergä aýlanyp gördüler.
Türkmenistanyň Ýaşlar baýragyny almak ugrundaky bäsleşige Halkara parahatçylyk we ynanyşmak ýylynda ýurduň ministrlikleri we pudaklaýyn dolandyryş edaralary Aşgabat we Arkadag şäherleriniň hem-de welaýatlaryň häkimlikleri tarapyndan ýaşlaryň ýüzlerçesiniň işi hödürlenilip, olardan ylym-bilimde, medeniýetde we beýleki ugurlarda üstünlik gazanyp, Türkmenistanyň Prezidentiniň adyl syýasatyny, durmuşa geçirýän özgertmelerini wagyz-nesihat etmekde ýokary döredijilik başarnygyny görkezenleriň 141-si Türkmenistanyň Ýaşlar baýragyna mynasyp görüldi.
Ýaşlar baýragyna mynasyp bolanlara Türkmenistanyň Prezidentiniň adyndan gymmat bahaly sowgatlar, şahadatnama hem-de döwlet Baştutanynyň «Ýaşlar — Watanyň daýanjy» atly kitaby dabaraly ýagdaýda gowşuryldy.
Dabaranyň ahyrynda Türkmenistanyň Ýaşlar baýragyna mynasyp bolanlaryň hem-de oňa gatnaşyjy bagtyýar ýaşlaryň adyndan hormatly Prezident Serdar Berdimuhamedowa Ýüzlenme kabul edildi.