Gyrgyzystanyň Premýer-ligasynyň 26-njy tapgyrynda geçirilen duşuşykda «Özgen» futbol kluby öz meýdançasynda «Bişkek Siti» toparyndan 1:2 hasaby bilen utuldy. Ýerli toparyň ýeke-täk goluny Türkmenistanyň ýygyndysynyň hüjümçisi Mihail Titow geçirdi.

28 ýaşly hüjümçi üçin bu gol häzirki möwsümiň ähli ýaryşlarynda onuň 10-njy goly boldy. Gyrgyzystanyň çempionatynda Titow 24 duşuşykda 8 gol geçirdi, şolaryň diňe 13-sinde esasy düzümde meýdança çykdy. Şeýle hem ol «Muras Ýunaýted» bilen geçirilen Gyrgyzystanyň Kubogynyň çärýek finalynda (1:2, goşmaça wagtda) bir gol geçirdi we 2027-nji ýylyň Aziýanyň Kubogynyň saýlama tapgyrynda Taýland bilen oýunda (3:1) Türkmenistanyň milli ýygyndysy üçin bir gol bilen tapawutlandy.

Öňki tapgyrda Titow «Gyrgyzaltyn» toparynyň derwezesine het-trik geçirip, duşuşygyň iň gowy oýunçysy diýlip yglan edildi.

Titow «Özgen» klubyna 2025-nji ýylyň fewralynda geçdi we onuň şertnamasy 31-nji dekabra çenli dowam edýär. Transfermarkt portalyndaky maglumatlara görä, türkmen hüjümçisiniň transfer bahasy 100 müň ýewro möçberinde bahalandyrylýar.

«Balkan» toparynyň ýetişdiren futbolçysy Titow 2016-njy ýylda toparyň esasy düzüminde ilkinji gezek çykyş etdi, bir ýyl soňra ol «Altyn Asyr» klubyna geçdi. 2018-nji ýyldan bäri Türkmenistanyň milli ýygyndysynda çykyş edýär we 2019-njy ýylda Ýaponiýanyň garşysyna Aziýanyň Kubogy ugrundaky duşuşyga gatnaşdy. «Altyn Asyr» bilen birnäçe gezek Türkmenistanyň çempiony boldy, şeýle hem 2023-nji ýylda «Arkadag» toparynyň düzüminde milli çempion boldy.