Girmek
Şu gün Arkadag şäherinde türkmen halkynyň Milli Lideri Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň mejlisinden soňra gaznanyň wise-prezidentleri bilen iş maslahatyny geçirdi.
«Watan» habarlar gepleşiginde habar berlişi ýaly, onda gaznanyň işiniň häzirki ýagdaýy we onuň öňünde durýan wezipeleri ýerine ýetirmegiň esasy ugurlary ara alnyp maslahatlaşyldy. Gaznanyň wise-prezidentleri häzirki döwürde alnyp barylýan işler we ony mundan beýläk-de hemmetaraplaýyn ösdürmek ugrunda edilýän tagallalar barada hasabat berdiler. Hususan-da, bu düzümiň halkara gatnaşyklaryny işjeňleşdirmek boýunça ýaýbaňlandyrylan çäreler barada giňişleýin maglumatlar berildi.
Gahryman Arkadag haýyr-sahawat gaznasynyň işini mundan beýläk-de kämilleşdirmek we halkara gatnaşyklarynyň ynsanperwer ugurlaryny ösdürmek bilen baglanyşykly meseleleriň yzygiderli gözegçilikde saklanmalydygyny belledi. Aýratyn-da goňşy ýurtlara türkmen asylly däplerine eýerilip doganlyk golunyň uzadylmalydygyny nygtap, türkmen halkynyň Milli Lideri Owganystanyň pajygaly ýertitreme zerarly ejir çeken ilatyna, çagalaryna ynsanperwerlik kömegini ibermek meselelerini işjeňleşdirmegi tabşyrdy.