Türkmenistan Merkezi Aziýada klimatyň üýtgemegi bilen baglanyşykly tehnologiýalar boýunça ýöriteleşdirilen sebit merkezini hem-de çölleşmäge garşy göreş merkezi döretmek başlangyjyny öňe sürýär. Bu barada Türkmenistanyň Daşary işler ministrliginiň ekologiýa we suw diplomatiýasy boýunça geňeşçisi Magtymguly Akmyradow «Türkmenistanyň nebiti we gazy – 2025» (OGT 2025) atly halkara maslahatyň we serginiň öňüsyrasyndaky sessiýada eden çykyşynda mälim etdi.

— Hormatly Prezidentimiziň BMG-niň Baş Assambleýasynyň 80-nji sessiýasynda eden çykyşynda bellenilişi ýaly, Türkmenistan Merkezi Aziýada klimatyň üýtgemegi bilen bagly tehnologiýalar boýunça ýöriteleşdirilen sebit merkezini döretmek ugrunda işleri dowam etdirer — diýip, diplomat aýtdy. Onuň sözlerine görä, bu merkez klimatyň üýtgemegine uýgunlaşmak we onuň täsirlerini ýumşatmak boýunça täze tehnologiýalary ornaşdyrmaga, şeýle hem ekologiýa innowasiýalary boýunça halkara hyzmatdaşlygy ösdürmäge gönükdiriler.

Akmyradowyň belleýşi ýaly, bu merkez Merkezi Aziýa ýurtlaryny, BMG-niň ýöriteleşdirilen agentliklerini we halkara ylmy jemgyýetçiligini birleşdirip, klimat tehnologiýalarynyň geçirilmegi boýunça ylym we amaly hyzmatdaşlygyň ulgamlaýyn meýdançasyna öwrülip biler.

Ikinji başlangyç Merkezi Aziýa ýurtlary üçin çölleşmäge garşy göreş boýunça sebitleýin merkezi döretmegi göz öňünde tutýar. Ministrligiň geňeşçisiniň düşündirişine görä, bu merkez BMG-niň degişli düzümleriniň goldawy bilen işläp, bu ugurda tagallalary utgaşdyrmak üçin möhüm meýdança bolar.

Mundan başga-da, Türkmenistan Amyderýa we Syrderýa derýalarynyň basseýnleri boýunça sebitleýin konwensiýalaryň taýýarlanylmagyny we kabul edilmegini öňe sürýär.

— Biz bu halkara hukuk resminamalaryň Merkezi Aziýada serhetara suw çeşmelerini durnukly, adalatly we netijeli dolandyrmak boýunça ylalaşylan çemeleşmeleri işläp taýýarlamak üçin ygtybarly esas bolmagyna umyt edýäris — diýip, Akmyradow nygtady.

Diplomat şeýle hem sebitdäki öňdebaryjy hünärmenleriň gatnaşmagynda geçirilen soňky ylmy barlaglaryň Amyderýa we Syrderýa üçin aýratyn basseýn çemeleşmesiniň zerurdygyny görkezendigini, sebäbi ähli suw basseýnleri üçin bir umumy çözgüdiň mümkin däldigini aýtdy.