Girmek
Türkmenistanyň futbol boýunça milli ýygyndysy Aziýa Kubogy–2027-niň saýlama tapgyrynyň dördünji oýnunda Şri-Lankanyň toparyny 2:1 hasaby bilen ýeňdi. D toparçanyň duşuşygy Arkadag şäherinde geçirildi.
Türkmen ýygyndysynyň düzüminde gollary Elman Tagaýew (52-nji minut) we Mekan Saparow (58) geçirdi. Şri-Lankanyň ýygyndysynyň ýeke-täk goly 67-nji minutda goragçy Güýçmyrat Annagulyýewiň awtogolunyň netijesinde geçirildi.
Dört tapgyrdan soň Türkmenistanyň milli ýygyndysy 9 utuk toplap, Taýlandyň topary bilen D toparçanyň liderligini paýlaşýar. Şri-Lanka üçünji orny eýelemek bilen, liderlerden 3 utuk yza galýar. Hiç hili utuk toplap bilmedik Hytaý Taýbeýi topary bolsa ýaryş tertibiniň soňky ornunda ýerleşdi. Aziýa Kubogy jemleýji ýaryşyna toparçanyň birinji ornuny eýelän ýygyndy gatnaşmaga hukuk alar.
Aziýa Kubogy–2027-niň final tapgyry 2027-nji ýylyň 7-nji ýanwaryndan 5-nji fewralyna çenli Saud Arabystanynda geçiriler. Bu ýaryşa yklymyň iň güýçli 24 milli ýygyndysy gatnaşar.