Girmek
ABŞ-nyň Illinoýs ştatyndan dört ýaşly Zorien Roýs ýokary intellektli adamlaryň birbada iki – «Mensa» we «Intertel» jemgyýetleriniň agzalygyna kabul edildi. Oglanjyk IQ çaga synaglary boýunça 160 balyň 156-syny gazanmagy başardy diýip, «NBC News» teleýaýlymy habar berdi.
Zorieniň golaýda dört ýaşy doldy, ol eýýäm ikinji synp derejesinde okaýar we droblary öwrenýär. Ene-atasy onuň akyl ösüşiniň öňde barýandygyny 18 aýlykka duýdular. Iki ýaşyndaka ol kitap okaýardy, öňe we yza 100-e çenli sanamagy başarýardy. Häzir oglanjyk iňlis dilinden başga-da bengal dilini bilýär. Ol ispan, fransuz we hindi dillerini öwrenýär.
Zorien ýurduň NASA kosmos edarasynyň alymy bolmagy arzuw edýär we kitaphananyň özüniň dünýäde iň halaýan ýeridigini aýdýar. Hasapdan başga, ol sporty, surat çekmegi, suwda ýüzmegi, erteki okamagy, dürli tapmaçalary çözmegi halaýar.