Girmek
Şu gün «Awaza» milli syýahatçylyk zolagynyň «Berkarar» myhmanhanasynda Türkmenistanyň daşary işler ministriniň orunbasary Ahmet Gurbanow bilen Atom energiýasy boýunça halkara agentliginiň (MAGATE) Baş direktorynyň orunbasary Lýu Huanyň arasynda duşuşyk geçirildi.
Türkmenistanyň DIM-iniň habar bermegine görä, duşuşykda Türkmenistan bilen MAGATE-niň arasyndaky hereket edýän maksatnamalara we taslamalara, hususan-da, saglygy goraýyş ulgamynda MAGATE-niň hünärmen we tehniki mümkinçiliklerini çekmäge aýratyn üns berildi.
Şeýle-de Türkmenistan bilen MAGATE-niň arasyndaky hyzmatdaşlygyň ýokary derejesi bellenildi.
Mundan başga-da, taraplar 2025 — 2029-njy ýyllar üçin Atom energiýasy boýunça halkara agentliginiň Türkmenistan üçin ýurt boýunça Çarçuwaly maksatnamasynyň taslamasynyň ylalaşylmagyny ara alyp maslahatlaşdylar. Ýakyn wagtda bu resminama gol çekmäge özara gyzyklanma bildirildi.
MAGATE-niň Baş direktorynyň orunbasary BMG-niň Deňze çykalgasy bolmadyk ösüp barýan döwletler boýunça üçünji maslahatynyň ähmiýetini belläp, ýokary derejeli guramaçylyk we myhmansöýerlik üçin türkmen tarapyna minnetdarlyk bildirdi.
Ýeri gelende bellesek, BMG-niň Deňze çykalgasy bolmadyk ösüp barýan döwletler boýunça üçünji maslahaty we onuň bilen ugurdaş çäreler 4 — 8-nji awgust aralygynda «Awaza» milli syýahatçylyk zolagynda geçirilýär.