Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklar institutynyň we Türkmen döwlet binagärlik we gurluşyk institutynyň mugallymlaryna iki günlik okuw sapaklary geçirildi. Halkara ynsanperwer ylymlary we ösüş uniwersitetinde guralan okuw sapaklary Kent döwlet uniwersitetiniň professory Marta Merrill tarapyndan alnyp baryldy. Sapaklar Kent döwlet uniwersitetiniň wise-prezidenti Marçello Fantoniniň ýolbaşçylygyndaky wekiliýetiň Türkmenistanyň ýokary okuw mekdeplerine amala aşyrylan iş saparynyň çäginde guralýar. Bu barada Türkmenistanyň Bilim ministirliginiň resmi saýtynda habar berildi.
Habarda bellenilişi ýaly, okuw sapaklary «Okuw meýilnamasyny işläp düzmek we okuwyň netijelerine baha bermek» we «Ýokary bilim edaralaryň mümkinçiliklerine we akkreditasiýa baha bermek» atly temalar boýunça geçirildi.
Okuw sapagyň dowamynda bilimiň netijeliligini kesgitlemek, okuw meýilnamalaryny halkara ülňülerine laýyk getirmek, okuw meýilnamalary işläp düzmek, akkreditasiýa işini ara alyp maslahatlaşmak, öňdebaryjy tejribäni we akkreditasiýa modellerini öwrenmek, ýokary bilimiň hilini üpjün etmek üçin halkara çarçuwalar we strategiýalar ýaly mowzuklar ara alnyp maslahatlaşyldy. Şeýle hem okuw sapagynyň çäginde bilimiň hilini ýokarlandyrmagyň halkara mysallaryna, dünýä bilim giňişligine integrasiýa we bäsdeşlik artykmaçlygynyň görkezijilerine seredildi.
Çäräniň ahyrynda, gatnaşyjylar sorag bermäge we ara alnyp maslahatlaşylan mowzuklar barada jikme-jik düşündiriş almaga mümkinçilik aldylar diýlip, habarda bellenilýär.