Şu gün Türkmenistanyň daşary işler ministriniň orunbasary M.Bäşimowa Saud Arabystany Patyşalygynyň Türkmenistandaky Adatdan daşary we Doly ygtyýarly ilçisi Amer bin Ali Al-Şehri bilen duşuşyk geçirdi.

Türkmenistanyň DIM-iniň habar bermegine görä, duşuşygyň dowamynda taraplar syýasy-diplomatik we söwda-ykdysady ugurlardaky ikitaraplaýyn gatnaşyklaryň häzirki ýagdaýyny hem-de geljegini ara alyp maslahatlaşdylar.

Halkara düzümleriň, hususan-da, BMG-niň çägindäki özara hyzmatdaşlyk bilen bagly meseleler boýunça pikir alşyldy. Şol bir wagtyň özünde ikitaraplaýyn gatnaşyklaryň şertnama-hukuk binýadyny kämilleşdirmek bilen baglanyşykly meselelere garaldy. Şeýle-de medeni-ynsanperwer ugurlarda hyzmatdaşlygyň ösdürilmegine aýratyn üns berildi.