Türkmenistanyň hokkeý boýunça ýygyndysy üçünji diwizionyň «A» toparynda çykyş etmek bilen, dünýä çempionatynyň ikinji tapgyrynda Türkiýäniň ýygyndysyny ýeňdi.

Oýun Stambulda geçirildi we 2:1 (1:1, 1:0, 0:0) hasaby bilen tamamlandy. Ýeňijileriň tarapyndan şaýbalary Kerwen Baýlyýew (8-nji minutda) we Aleksandr Wahowskiý (22) geçirdiler. Türkiýäniň ýygyndysynyň ýeke-täk şaýbasy Ferhat Bakalyň (17) hasabyna ýazyldy.

Ýaryş gününiň beýleki oýunlarynda Gyrgyzystanyň ýygyndysy Lýuksemburgyň toparyny 6:0 hasaby bilen derbi-dagyn etdi, Günorta Afrika Respublikasynyň hokkeýçileri bolsa 3:2 hasaby bilen Bosniýa we Gersegowinanyň ýygyndysyny ýeňdiler.

Ýaryş tertibinde Gyrgyzystanyň we Türkmenistanyň ýygyndylary öňdeligi eýeleýärler, olaryň her biriniň 6 utugy bar, olardan soň Türkiýäniň we Günorta Afrika Respublikasynyň ýygyndylary gelýär, olaryň 3 utugy bar, ýaryş tertibiniň ahyrky setirlerini Bosniýa we Gersegowinanyň hem-de Lýuksemburgyň ýygyndylary jemleýärler, olaryň entek utuklary ýok.

Üçünji diwizionyň «A» toparynda dünýä çempionaty 27-nji aprele çenli dowam eder. Ýeňiji ýokary derejä çykmaga mümkinçilik alar, ýagny güýji boýunça ikinji diwizionyň «B» toparyna ýollanma eýe bolar.

Ylýas Weliýewiň hokkeýçileriniň indiki oýny 24-nji aprelde Lýuksemburgyň ýygyndysyna garşy geçiriler. Duşuşyk Aşgabat wagty bilen sagat 15:00-da başlanar. Soňra türkmen ýygyndysy Gyrgyzystanyň ýygyndysy (25-nji aprelde) we Günorta Afrika Respublikasynyň ýygyndysy (27 aprelde) bilen oýnar.