Girmek
23-24-nji aprelde Malaýziýanyň paýtagty Kuala-Lumpurda geçiriljek Türkmenistanyň ykdysadyýetine daşary ýurt maýa goýumlaryny çekmek boýunça halkara foruma («TEIF 2025») 42 ýurtdan 470 wekiliň gatnaşmagyna garaşylýar.
Kuala-Lumpur şäherindäki «Mandarin Oriental» myhmanhanasynda «TEIF 2025-iň» gatnaşyjylarynyň hasaba alnyşy başlandy.
Myhmanhanada forumyň öňüsyrasyndaky kabul edişlik dabarasy geçiriler. Oňa döwlet edaralarynyň, işewür toparlaryň hem-de halkara guramalaryň wekilleriniň gatnaşmagyna garaşylýar.
Forumyň resmi açylyş dabarasy ertir, 23-nji aprelde Kuala Lumpur «Convention Centre» merkezinde geçiriler. «TEIF 2025-iň» çäginde strategik maslahatlaryň, maýa goýum taslamalarynyň tanyşdyrylyşynyň guralmagy hem-de birnäçe ylalaşyga gol çekilmegi meýilleşdirilýär. Forumda esasy üns energetika, infrastruktura we logistika ulgamlaryna berler.
Ýeri gelende bellesek, Türkmenistanyň hökümet wekillerini, «Türkmengaz», «Türkmennebit» döwlet konsernleriniň ýolbaşçylaryny hem-de Türkmenistanyň Söwda-senagat edarasynyň wekillerini öz içine alýan ýokary derejeli wekiliýet hem bu foruma gatnaşar.