Türkmenistanyň Prezidenti Serdar Berdimuhamedowyň Özbegistana amala aşyran iş sapary tamamlandy. Bu barada uza.uz özbek saýty habar berdi.

Samarkant şäheriniň Halkara howa menzilinde Türkmenistanyň Prezidentini Özbegistan Respublikasynyň Premýer-ministri Abdylla Aripow hem-de beýleki resmi adamlar ugratdylar.

Ozal habar berşimiz ýaly, Türkmenistanyň Prezidenti Özbegistana amala aşyran iş saparynyň dowamynda «Merkezi Aziýa — Ýewropa Bileleşigi» görnüşindäki birinji sammite hem-de Samarkant halkara klimat forumyna gatnaşdy. Saparyň çäklerinde Özbegistanyň Prezidenti Şawkat Mirziýoýew, şeýle-de Ýewropa Geňeşiniň, Ýewropa Komissiýasynyň, Ýewropanyň Täzeleniş we ösüş bankynyň ýolbaşçylary bilen ikiçäk duşuşyklar geçirildi.

Türkmenistanyň döwlet Baştutanynyň goňşy ýurda sapary Aral medeniýetiniň sammitiniň ekspozisiýasyna aýlanyp görmek bilen jemlendi.