Girmek
Türkmenistanyň stoluň üstünde oýnalýan tennis boýunça ýygyndysy 27-30-njy ýanwar aralygynda Doha (Katar) şäherinde geçirilýän halkara ýaryşyna gatnaşmaga ugrady.
Türkmenistanyň Stoluň üstünde oýnalýan tennis federasiýasynyň metbugat gullugynyň habar bermegine görä, bu ýaryşda U11-den U19-a çenli ýaş toparlary boýunça medallar ugrunda bäsleşiler. Ýaryşa Aziýadan, Arap ýurtlaryndan we Ýewropadan güýçli türgenler gatnaşýarlar, bu ýagdaý bolsa bäsleşigi reýtingli edýär we iň oňat oýunçylary özüne çekýär.
Türkmenistan ýygyndysynyň hatarynda bu ýaryşda Ylýas Allanazarow, Wepa Meredow, Nazym Durdyýew, Atahan Pygamow, Dörtguly Allanazarow, Mukam Artykow, Arslan Gurbanow, Nazar Abdyýew we Jennet Amandurdyýewa ýaly tennisçiler gatnaşar. Ýurdumyzyň ýygyndy toparyna tälimçi Dawut Ýakubow ýolbaşçylyk edýär.
Bu ýaryş türkmen türgenleriniň 2026-njy ýyldaky Ýaşlar Olimpiýa oýunlaryna we 2028-nji ýylda Los-Anželesde geçiriljek Olimpiýa oýunlaryna taýýarlygynyň başlangyjydyr.