Girmek
Watan goragçylarynyň gününe gabatlanylyp, Ahal welaýatynyň Polisiýa müdirliginiň Sarahs, Mary welaýatynyň Polisiýa müdirliginiň Sakarçäge, Daşoguz welaýatynyň Polisiýa müdirliginiň Görogly, Lebap welaýatynyň Polisiýa müdirliginiň Çärjew, Köýtendag etraplarynyň polisiýa bölümlerinde Awtoulaglaryň tehniki ýagdaýyny anyklaýyş we hasaba alyş toparynyň edara binalarynyň açylyş dabaralary boldy.
Türkmen metbugatynda berilýän habara görä, aýdym-sazly çykyşlar bilen utgaşykly dowam eden dabaralaryň barşynda täze desgalary bina etmekde has tapawutlanan gurluşykçylara Türkmenistanyň Prezidentiniň adyndan sowgatlar gowşuryldy. Dabaralara gatnaşyjylar Awtoulaglaryň tehniki ýagdaýyny anyklaýyş we hasaba alyş toparynyň edara binalarynyň içine aýlanyp, olarda döredilen döwrebap şertlerdir mümkinçilikler bilen tanyşdylar.
Täze, döwrebap binalaryň gurluşyk işleri Türkmenistanyň Içeri işler ministrliginiň Gurluşyk birleşigi tarapyndan ýerine ýetirildi. Olarda ornaşdyrylan enjamlar awtoulaglaryň dolandyryş ulgamynyň tehniki ýagdaýyny, tizlik ölçeýjisiniň işleýşini, yşyklandyryş ulgamynyň talabalaýyklygyny, hereketlendirijisiniň bölüp çykarýan gazynyň mukdarynyň derejesini, ulagyň ekologik talaplara kybaplygyny, ýeňil we ýük awtoulaglarynyň duruzyjy ulgamlarynyň talabalaýyklygyny barlamak işlerini ýokary hilli geçirmäge mümkinçilik berýär.