Girmek
Şweýsariýanyň Federal Daşary işler edarasynda Türkmenistanyň Adatdan daşary we Doly ygtyýarly ilçisi Wepa Hajyýew bilen Döwlet sekretarynyň ýörite geňeşçisi hanym Anýa Zobristiň arasynda duşuşyk geçirildi. Bu barada Türkmenistanyň Şweýsariýadaky ilçihanasy habar berdi.
Söhbetdeşlikde Türkmenistan bilen Şweýsariýanyň arasyndaky ikitaraplaýyn gatnaşyklaryň häzirki ýagdaýy ara alnyp maslahatlaşyldy. Hususan-da, syýasy hyzmatdaşlyk, köptaraplaýyn platformalaryň çägindäki hyzmatdaşlyk hem-de hyzmatdaşlygyň kadalaşdyryjy-hukuk binýadyny kämilleşdirmek ýaly meselelere garaldy.
Ykdysady gatnaşyklary pugtalandyrmaga aýratyn üns berildi. Taraplar söwda gatnaşyklaryny we maýa goýum hyzmatdaşlygyny ösdürmäge gönükdirilen bilelikdäki taslamalary durmuşa geçirmegiň geljegini ara alyp maslahatlaşdylar.
Mundan başga-da, suwuň durnukly dolandyrylmagyna ýardam berýän Blue Peace başlangyjy boýunça birnäçe daşky gurşaw meselesi ara alnyp maslahatlaşyldy. Diplomatlar bu mesele boýunça hyzmatdaşlygy çuňlaşdyrmaga taýýardyklaryny mälim etdiler we iki ýurt üçin durnukly ösüşiň ähmiýetini bellediler.
Duşuşykdan soň taraplar konstruktiw gepleşikleri dowam etdirmek we esasy ugurlarda hyzmatdaşlygy giňeltmäge gönükdirilen bilelikdäki başlangyçlary durmuşa geçirmek barada ylalaşdylar.