Girmek
Türkmenistanly sirk ussatlary Monakadaky Monte Karlo halkara sirk festiwalyna gatnaşarlar. Bu barada festiwalyň resmi saýtynda habar berildi.
17 — 26-njy ýanwar aralygynda geçiriljek 47-nji Monte Karlo halkara sirk festiwaly dünýäniň dürli ýurtlaryndan iň meşhur sirk toparlaryny bir ýere jemlär. Olaryň arasynda Türkmenistan bilen birlikde, Hytaýyň, Çiliniň, Meksikanyň meşhur sirk toparlary bar. Habar berlişi ýaly, bu abraýly festiwalda Türkmenistana «Galkynyş» milli at üstündäki oýunlar topary wekilçilik eder.
«Türkmenistanly sirk ussatlary ajaýyplygy bilen dünýäni haýrana goýýan ahalteke bedewleriniň üstündäki oýunlaryny tomaşaçylara hödürlärler» diýip, guramaçylyk toparynyň petekler boýunça bölümi köpçülikleýin maglumat paýlaşdy.
Ozal habar berşimiz ýaly, 2023-nji ýylyň ýanwar aýynda «Galkynyş» toparynyň ýolbaşçysy Pygy Baýramdurdiýewiň we Türkmenistanyň Döwlet sirkiniň müdiri Serdar Gurbangulyýewiň festiwalyň prezidenti Urs Pils bilen duşuşygy geçirildi. Duşuşykda festiwalyň guramaçylyk komiteti türkmenleri iň gowy atşynaslarynyň biri hasap etmek bilen, dünýä derejesindäki bu abraýly tomaşa gatnaşmagy teklip edip, «Galkynyş» milli at üstündäki oýunlar toparyna resmi çakylyk berdi.
«Galkynyş» toparynyň Monte Karlo festiwalyna gatnaşmagy halkara arenasynda türkmen sirk sungatynyň ussatlygynyň subutnamasy bolar. Resmi çakylyk berlen döwründen başlap, toparyň ýigitleri sirk festiwalynda çykyş etmek üçin özboluşly maksatnama taýýarladylar.