«Ahal» futbol klubynyň ýarym goragçysy Elman Tagaýew 2024-nji ýylyň möwsüminiň jemleri boýunça Türkmenistanyň çempionatynyň iň ökde oýunçysy diýlip ykrar edildi – diýip, TFF-nyň saýty habar berýär.

Baýraklary gowşurmak dabarasy Aşgabatda geçirildi. 2024-nji ýylyň möwsüminde 35 ýaşly Tagaýew 15 gol geçirdi. «Ahal» 67 utuk toplady we ýurdumyzyň Ýokary ligasynyň kümüş medalyny gazandy.

«Arkadagyň» hüjümçisi Didar Durdyýew Türkmenistanyň çempionatynda iň köp gol geçiren oýunçy hökmünde sylaglandy. Durdyýewiň hasabynda 31 gol bar.

2024-nji ýylyň möwsüminiň iň ökde tälimçisi diýlip «Arkadag» toparyna ýolbaşçylyk edýän Wladimir Baýramow yglan edildi. Onuň ýolbaşçylygynda «akylly» şäheriň topary yzly-yzyna ikinji gezek çempionatyň ýeňijisi boldy we Türkmenistanyň Kubogyny eýelemegi başardy, şeýle hem ilkinji gezek ýurduň Superkubogyny gazandy.

Futbol klublarynyň ýaşlar düzümleriniň arasynda möwsümiň iň ökde ýaş oýunçysy diýlip «Arkadag-II» toparynyň 18 ýaşly hüjümçisi Enwer Annaýew yglan edildi. Onuň hasabynda 32 gol bar.

«Arkadag» we «Arkadag-II» toparlary «Adalatly oýun» üçin Fair Play baýragyna mynasyp boldular.

Möwsümiň iň ökde emini diýlip Resul Mämmedow yglan edildi.

Futbol federasiýasyndan aýratyn baýraga möwsümiň gutarmagyna az wagt galanda futbol karýerasyny tamamlan Türkmenistanyň ýygyndy komandasynyň we «Arkadag» toparynyň kapitany Arslanmyrat Amanowa gowşuryldy.

Şeýle hem Türkmenistanyň futzal boýunça Superligasynyň wekilleri hem öz baýraklaryna mynasyp boldular.