Aýsake Eke öňki Premýer-ministr iş başyndan gidenden soňra, Tonga Patyşalygynyň täze Hökümet başlygy boldy. Bu barada «Matangi Tonga» neşirine salgylanýan TASS ýazýar.

Habara görä, Aýsake Eke üçin deputatlaryň 24-sinden 16-sy ses berdi. Ol wezipä saýlanandan soňra: «Başlyk, men bu jogapkärçiligi öz üstüme sadyklyk bilen kabul edip alýaryn» diýdi.

2014-2017-nji ýyllarda Eke maliýe ministri, soňky ýyllarda döwlet hasaplaşyklary boýunça Wekiller palatasynyň Hemişelik geňeşiniň başlygy boldy.

Öň Tonga Patyşalygynyň Premýer-ministri Siaosi Sowaleni parlamentde özüne ynam etmezlik wotumynyň girizilmegi barada ses berlişige garaşman, iş başyndan gitdi.

Tonga Patyşalygy Ýuwaş ummanyň günorta-günbataryndaky ilaty 106,8 müň adam (2022-nji ýyldaky ýagdaýa görä) bolan ada-döwletdir. Patyşalygyň Konstitusiýasyna laýyklykda, ýurtda ýerine ýetiriji häkimiýetiň ygtyýarlylyklary Parlamentiň öňünde jogapkär bolan Ministrler Kabinetine degişlidir.

Ministrleri Patyşa Premýer-ministriň teklibi bilen belleýär. Döwlet Baştutany olary parlamentiň, Premýer-ministriň teklibi ýa-da öz başlangyjy bilen işden aýryp bilýär.