Girmek
10-njy dekabrda Türkmenistanyň Daşary işler ministrliginiň Halkara gatnaşyklary institutynda Katar Döwletiniň Diplomatiýa institutynyň direktory Abdulaziz Mohamed Horryň alyp barmagynda umumy sapak geçirildi. Oňa TDIM-iň Halkara gatnaşyklary institutynyň mugallymlary we talyplary gatnaşdylar.
Türkmenistanyň Bilim ministrliginiň metbugat gullugynyň habar bermegine görä, umumy sapagyň dowamynda hormatly myhman Türkmenistan bilen Katar döwletiniň arasyndaky syýasy-diplomatik hem-de ylym-bilim ugurlary boýunça üstünlikli alnyp barylýan hyzmatdaşlygyň aýratynlyklary barada gürrüň berdi. Şeýle-de ol talyplary özüniň baý iş tejribesi bilen tanyşdyrdy.
Talyplar hormatly myhmana özlerini gyzyklandyrýan sowallary bilen ýüzlendiler. Diplomatik gullugynyň baý tejribesine eýe bolan myhman özüne berlen sowallara giňişleýin jogap bermek bilen, talyplara geljekki hünär ugurlarynda ýokary derejelere eýe bolmaklaryny arzuw etdi.