Türkmen halkynyň Milli Lideri Arkadag şäherinde iş maslahatyny geçirdi, Türkmenistanda «Visa» kompaniýasy bilen hyzmatdaşlygyň 30 ýyllygyna bagyşlanan halkara işewürlik forumy geçirilýär, Türkmenbaşy şäherinde dört sany täze ýaşaýyş jaýynyň gurluşygy başlanar we beýleki habarlar

Türkmenistanda

1. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyryp, bu ýerde guruljak täze binalaryň taslamalary, gurluşygy alnyp barylýan desgalardaky işleriň ýagdaýy bilen tanyşdy, şeýle hem ugurdaş düzümleriň ýolbaşçylarynyň gatnaşmagynda iş maslahatyny geçirdi.

2. Gurbanguly Berdimuhamedow Arkadag şäherine iş saparynyň barşynda Akhan hem-de Köpetdag şaýollarynyň çatrygynda ýerleşýän aýlaw ýolunyň deňinde saklandy. Türkmen halkynyň Milli Lideri halkalaýyn aýlaw ýolunyň gurluşygyny we onuň merkezi künjeginde ýerleşdirilýän şekilleri synlap, bu binany «Taýçanak» diýip atlandyrmagyň maksadalaýykdygyny belledi. Bedew ähli arzuwlaryň wysalydyr, oňa atlanan belent maksatlar bilen ak ýola rowanadyr.

3. 27-nji noýabrda Aşgabatda «Visa» töleg tehnologiýalarynyň forumy: Merkezi Aziýada we Türkmenistanda 30 ýyllyk innowasiýalar we sanly özgertmeler» atly halkara işewürlik forumy öz işine başlady. Dabara dürli ýurtlardan 100-e golaý wekil gatnaşýar. Umumy mejlisde maliýe pudagynyň esasy wekilleri, şol sanda Türkmenistanyň Döwlet daşary ykdysady iş bankynyň müdiriýetiniň başlygy we «Visa» kompaniýasynyň wise-prezidenti çykyş etdi. Olar öz çykyşlarynda sanlylaşdyrmagyň we sebitiň bank ulgamyna innowasion tehnologiýalary ornaşdyrmagynyň ähmiýetini bellediler.

4. Türkmenistanyň Balkan welaýatynyň Türkmenbaşy şäheriniň Ruhnama köçesiniň ugrunda 4 sany her biri 40 öýli ýaşaýyş jaýlary gurlar. Türkmenistanyň Prezidenti degişli Karara gol çekip, «Türkmennebit» döwlet konsernine bu ýaşaýyş jaýlarynyň taslamalaryny düzmek we olary ýanaşyk ýerlerini abadanlaşdyryp gurmak barada «Iner» hojalyk jemgyýeti bilen şertnama baglaşmaga ygtyýar berdi. Gurluşyk işlerine şu ýylyň noýabr aýynda başlamak we ýaşaýyş jaýlaryny 2026-njy ýylyň noýabr aýynda ulanmaga doly taýýar edip tabşyrmak bellenildi.

5. Naberežnyýe Çelny döwlet pedagogika uniwersitetiniň mugallymlary Aşgabatda A.S.Puşkin adyndaky umumybilim berýän bilelikdäki türkmen-rus mekdebine baryp gördüler. Myhmanlar mekdebiň okuwçylaryny – halkara olimpiadalaryň ýeňijilerini sylaglamak dabarasyna gatnaşdylar. 5 – 8-nji synp okuwçylar üçin NÇDPU-nyň mugallymlary Puşkiniň, Lermontowyň we Glinkanyň eserleri boýunça ussatlyk sapaklaryny geçirdiler. şeýle hem mekdebiň mugallymlary üçin zehinli çagalar bilen işlemek boýunça ylmy-usuly okuw maslahaty geçirildi.

6. Türkmenistanyň Fransiýadaky ilçisi Maksat Çaryýew «Crans Montana» forumynyň we Bütindünýä diplomatiýa akademiýasynyň prezidenti we esaslandyryjysy Žan-Pol Karteron bilen duşuşdy. Duşuşykda hyzmatdaşlygyň mümkin bolan ugurlary ara alnyp maslahatlaşyldy. Karteron Aşgabatda abraýly halkara forumy guramaga gyzyklanma bildirdi.

7. Aşgabatda durnukly ulag boýunça ITTC – 2024 halkara maslahatynyň işi dowam edýär, onuň ikinji güni innowasion ulag çözgütlerini we logistika strategiýalaryny ara alnyp maslahatlaşmaga bagyşlandy. Mejlisiň dowamynda oňa gatnaşyjylar ulag geçelgelerini ösdürmegiň geljegi, logistikany sanlylaşdyrmak, ulag pudagynda innowasion tehnologiýalar we howanyň üýtgemeginde ulagyň orny barada pikir alyşdylar. Elektromobilleriň, awtonom ulag serişdeleriniň we uglerodyň täsirini azaltmagyň meselelerine aýratyn üns berildi.

Dünýäde

8. Bütin dünýäde tomaşaçylaryň söýgüsini gazanan «Harabalykdan çykan millioner» («Миллионер из трущоб») dramasy kinematografiýaçylaryň ünsüni ýene bir gezek özüne çekdi. «Bridge7» kompaniýasy asyl hekaýa esasynda dolymetražly dowam filmini we teleseriallary döretmek hukugyna eýe boldy. Täze taslamalar tomaşaçylara baş gahryman Jamalyň «täze başdangeçirmelerini» hödürlemegi wada berýär.

Sport habarlary

8. «Altyn Asyr» şu gün AFK-2 Çempionlar ligasynyň toparçalaýyn tapgyrynyň bäşinji aýlawynyň çäklerindäki duşuşykda öz meýdançasynda Yragyň «Eýr Fors» toparyny kabul eder. Duşuşyk «Aşgabat» stadionynda geçiriler we ýerli wagt bilen 19:00-da başlar. Giriş mugt. Ozal toparlar toparçalaýyn tapgyryň birinji aýlawynda duşuşdylar. Bagdatda geçirilen oýunda «Eýr Fors» ýeňiş gazandy, oýun 2:1 hasabynda tamamlandy. «Altyn Asyr» dört oýunda asla utuk toplap bilmän, «B» toparçada dördünji orny eýeleýär. «Eýr Fors» alty utuk bilen üçünji orunda barýar.

9. «Arkadag» Didar Durdyýewiň het-trigi netijesinde futbol boýunça Türkmenistanyň çempionatynyň 31-nji tapgyrynyň oýnunda myhmançylykda «Köpetdagdan» üstün çykdy. Aşgabatda geçirilen duşuşyk myhmanlaryň peýdasyna 8:0 hasabynda tamamlandy. Bu ýeňiş netijesinde «Arkadag» 84 utuk toplap, ýaryşyň sanawyndaky öňdebaryjylygyny berkitdi. «Akylly» şäheriň klubynyň Türkmenistanyň çempionatyndaky ýeňişli tapgyrynyň yzygiderligi 52 oýna ýetdi. Tapgyryň beýleki oýunlarynda «Ahal» öz meýdançasynda «Nebitçini» 2:0 hasabynda ýeňdi, «Şagadam» bolsa «Merwden» 1:0 hasabynda üstün çykdy.