Türkmenistanyň Daşoguz welaýatynda Howanyň üýtgemegi boýunça milli ýaşlar konferensiýasynyň (LCOY) ilkinji ýygnagy geçirildi.

Duşuşyk Türkmen oba hojalyk institutynda guraldy we ýurduň ýaş ýolbaşçylarynyň hem-de hünärmenleriniň gatnaşmagynda howanyň üýtgemegine uýgunlaşmak bilen baglanyşykly möhüm meseleleri ara alyp maslahatlaşmak üçin platforma boldy.

Maslahata gatnaşyjylaryň arasynda BMG-niň dürli ýöriteleşdirilen guramalarynyň, Beýik Britaniýanyň ilçihanasynyň wekilleri, Aşgabatdan gelen wekiliýet, şeýle hem Durnukly ösüş maksatlarynyň ýaş ilçileri: Jemile Umarowa, Ýaran Hudaýberdiýew, Gurbangül Sapargeldiýewa, Yslam Saryjaýew bar.

Türkmenistanyň Daşary işler ministrliginiň wekili, şeýle-de Türkmen oba hojalyk institutynyň rektory Döwlet Ýolow maslahaty açyp, çärä gatnaşyjylara söz berdi.

Maslahatyň birinji sessiýasynda BMG-niň we Beýik Britaniýanyň ilçihanasynyň wekilleri çykyş edip, howanyň üýtgemegine garşy göreşde halkara hyzmatdaşlygyň ähmiýetine ünsi çekdiler.

Umumy mejlisden soňra, çärä gatnaşyjylar iş toparlarynda iň möhüm temalar ara alnyp maslahatlaşylýan degişli sessiýalara bölündi:

1. Durnukly oba hojalygy we howanyň üýtgemegine uýgunlaşma tehnologiýalary.

2. Howanyň üýtgemegi şertlerinde durnukly suw dolandyryşy.

3. Türkmenistanyň Aralýaka sebitinde tebigy baýlyklary durnukly dolandyrmak.

4. Azyk howpsuzlygyny üpjün etmek üçin oba hojalygynda gözleg işleri.

Maslahat jemleýji sessiýa bilen tamamlandy, onda toparyň ýolbaşçylary Türkmenistanyň ýaşlarynyň beýannamasyny “Ýol kartasyna” girizmek baradaky tekliplerini hödürlediler.

Çäräniň soňunda oňa gatnaşyjylar bilelikde surata düşdüler.

Türkmenistanyň demirgazyk sebitinde bu çäräniň geçirilmegi howanyň üýtgemegi babatynda ýaşlaryň hereketini güýçlendirmekde möhüm ädim boldy we ýurtda mundan beýläkki ekologiýa başlangyçlaryna esas döretdi.