Girmek
Türkmenistanyň ýaş himiýaçylary 21–26-njy aprel aralygynda Hytaýyň Şençžen şäherindäki MDU-PPI rus–hytaý uniwersitetinde geçirilen himiýa boýunça 58-nji halkara Mendeleýew olimpiadasyna Aşgabatdaky S.Türkmenbaşy adyndaky ýöriteleşdirilen umumybilim berýän mekdep-internatyň himiýa mugallymy Nazar Mämmedowyň ýolbaşçylygynda gatnaşyp, üstünlikli çykyş etdiler.
Aşgabat şäherindäki S.Türkmenbaşy adyndaky ýöriteleşdirilen umumybilim berýän mekdep-internatyň 11-nji synp okuwçylary Şatlyk Batyrow, Aýgül Atajanowa, Jeren Akmyradowa we şol mekdep-internatyň 10-njy synp okuwçysy Rüstem Jumaýew olimpiadada bürünç medallara eýe boldular. Bu barada HHM habar berýär.
Habarda bellenilişi ýaly, bu olimpiada 26 ýurtdan 151 mekdep okuwçysy gatnaşdy. Olimpiada gatnaşanlara berlen tabşyryklar, adatça, Bütindünýä himiýa olimpiadasynda berilýänlerden has kyn bolmak bilen, diňe nazary taýýarlygy däl, eýsem, toparlaýyn işlemek endigini we döredijilikli çemeleşmegi-de talap edýär.