Girmek
Türkmenistanyň futbol boýunça milli ýygyndysy Dünýä çempionaty-2026 ýaryşynyň saýlama tapgyr duşuşygynda Eýranyň toparyna garşy ak köýnekçede çykyş eder diýip, TFF-niň metbugat gullugy habar berýär.
«E» toparçanyň bu duşuşygy ertir, has takygy 26-njy martda «Aşgabat» köpugurly stadionynda geçiriler. Duşuşyk Aşgabat wagty bilen sagat 20:00-da başlanar.
Bu wajyp oýnuň öňüsyrasynda, şu gün 25-nji martda baş tälimçi Mergen Orazowyň şägirtleri metbugat wekilleri üçin açyk türgenleşik geçirerler. Ol sagat 17:00-da başlanar. Soňra bolsa sagat 18:00-da Türkmenistanyň ýygyndy toparynyň resmi metbugat maslahaty guralar.
Sagat 18:30-da žurnalistler Eýranyň milli ýygyndysynyň tälimçiler toparyna we futbolçularyna öz sowallaryny berip bilerler. Sagat 19:00-da hem eýranly futbolçylar oýundan öňki türgenleşige çykarlar.
Bu çäreleriň ählisiniň «Aşgabat» stadionynyň çäginde geçiriljekdigini bellemelidiris. Iki toparyň türgenleşikleri hem merkezi oýun meýdançasynda, metbugat maslahaty bolsa maslahatlar zalynda geçiriler.