Ýakynda Döwletmämmet Azady adyndaky Türkmen milli dünýä dilleri institutynda Türkmenistanyň umumybilim berýän orta mekdepleriniň IX-XI synp okuwçylarynyň arasynda nemes dili dersi boýunça olimpiada geçirildi. Oňa deslapky tapgyrda ýeňiji bolan 15 okuwçy gatnaşdy.

Olimpiada iki tapgyrda geçirilip, 1-nji tapgyry — «Pähim - paýhas ummany Magtymguly Pyragy» atly temadan düzme ýazmakdan ybarat boldy. Olimpiadanyň 2-nji tapgyrynda bäsleşijiler nemes dilinde okap, diňläp düşünmek we ýazmak boýunça öz ukyp-başarnyklaryny görkezdiler.

Olimpiadanyň netijeleri Nemes dili hepdeliginiň jemleýji dabarasynda yglan edildi.

Eminler toparynyň gelen netijesi boýunça aşakdaky görkezilen okuwçylar ýeňiji diýlip yglan edildi:

Baş baýrak — Ejeş Annaýewa, Aşgabat şäherindäki ýöriteleşdirilen 16-njy orta mekdebiniň 11-nji synp okuwçysy;

1-nji orun — Leýli Durdyýewa, Aşgabat şäherindäki ýöriteleşdirilen 27-nji orta mekdebiniň 11-nji synp okuwçysy;

2-nji orun — Şatlyk Babaýew, Aşgabat şäherindäki ýöriteleşdirilen 29-njy orta mekdebiniň 10-njy synp okuwçysy;

3-nji orun — Näzik Borjakowa, Daşoguz şäherindäki 26-njy ýöriteleşdirilen mekdebiniň 11-nji synp okuwçysy.

Olimpiýadanyň ýeňijileri Döwletmämmet Azady adyndaky Türkmen milli dünýä dilleri institutynyň Diplomlary, olary taýýarlan mugallymlar institutyň Hormat hatlary bilen sylaglandylar.