Türkmenistanyň başlangyjy bilen döredilen Durnukly ulag ulgamynyň dostlary toparyna täze agzalar goşuldy

Durnukly ulag ulgamynyň dostlary toparynyň IV onlaýn mejlisinde Nikaragua, Laos we Marokko tarapyndan bu topara agza bolmak üçin iberilen arzalar tassyklandy. Bu barada Türkmenistanyň BMG-niň ýanyndaky hemişelik wekilhanasynyň web sahypasynda habar berildi.

Şeýle hem duşuşykda 2026—2035-nji ýyllarda BMG-niň Durnukly ulag onýyllygyna, BMG-niň Baş Assambleýasynyň 2024-nji ýylda köptaraplaýyn ulag hyzmatdaşlygy boýunça Ýokary derejeli ýygnagyna we BMG-niň Durnukly ulag boýunça nobatdaky global konferensiýasyna taýýarlyk ara alnyp maslahatlaşyldy.

Durnukly ulag ulgamynyň dostlary toparynyň meýdançasynda ulag pudagynda halkara hyzmatdaşlyk meseleleri boýunça maglumat-seljeriş materiallaryny taýýarlamak üçin Konsultatiw geňeşiniň döredilmegine aýratyn üns berildi.

Şeýle hem mejlisde Bütindünýä ulag diplomatiýasy akademiýasyny döretmek pikiri goldanyldy, onuň ilkinji synag leksiýalaryny 2024-nji ýylyň fewral—aprel aýlarynda guramak meýilleşdirilýär.

Salgylanma. Durnukly ulag ulgamynyň dostlary topary BMG-ä agza ýurtlaryň resmi däl jemgyýeti bolup, ol 2022-nji ýylda Türkmenistanyň başlangyjy bilen döredildi. Bu toparyň maksady, ähli derejelerde ösüşiň we hyzmatdaşlygyň esasy hereketlendirijisi hökmünde durnukly ulag ulgamyny ösdürmekden ybaratdyr. Topar şeýle hem bu ugurda bilimleri we öňdebaryjy tejribäni paýlaşmak üçin möhüm meýdança bolup hyzmat edýär.

Afişa

Makalalar