Türkmenistanda

1. Türkmenistanyň ýokary derejeli wekiliýeti bilen Hytaý Halk Respublikasynyň Döwlet geňeşiniň wise-premýeriniň arasynda Pekinde geçirilen duşuşygyň dowamynda Türkmenistan we Hytaý energetika hyzmatdaşlygyny giňeltmek hem-de ikitaraplaýyn gatnaşyklary ösdürmek barada ylalaşyk gazandylar. Taraplaryň duşuşygy 18-19-njy oktýabr aralygynda Hytaýyň paýtagtynda geçiriljek «Bir guşak, bir ýol» başlangyjynyň çäklerindäki üçünji Halkara hyzmatdaşlyk forumynyň öňüsyrasynda geçirildi.

2. Aşgabatda «Geliň, Zemini bilelikde halas edeliň!» şygary bilen ikinji klimat ekofestiwaly geçirildi. Bu çäre ýaşlaryň ünsüni tebigy serişdelere aýawly çemeleşmek, tebigy baýlyklary ýerlikli peýdalanmak we daşky gurşawy goramak ýaly meselelere çekmäge gönükdirildi. Ýaş gatnaşyjylar üçin çäräniň işjeň zolagynyň bölümleriniň birinde robot söweşleri guraldy. Ekofestiwala gatnaşyjylar baýramçylyga zibilleri görnüşlere bölmegiň dogry usuly barada gürrüň berildi. Görnüşlere bölmek işini dogry ýerine ýetirmek plastigik, kagyz, aýna we metal önümlerini gaýtadan işlemek mümkinçiligini artdyrýar, bu bolsa olary öndürmek üçin çykýan çykdajylary azaltmaga şert döredýär.

3. Medeni çärä gatnaşmak üçin Türkmenistana gelen türk kinematografiýaçylary üçin «Gadymy Merw» döwlet taryhy-medeni goraghanasyna gezelenç guraldy. Gezelenç Uly we Kiçi Gyzgaladan başlandy, bu ýerde myhmanlara bu ýerleriň baý taryhy barada maglumat berildi. Soňra olar Hoja Ýusup Hemedanynyň we onuň egindeşleriniň aramgählerine zyýarat etdiler. Olar üçin Soltan Sanjaryň kümmetiniň öňünde ýerli senetçileriň, şeýle hem türkmenleriň milli aşhanasynyň sergisi guraldy.

4. Türkmenistanyň daşary işler ministriniň orunbasary Mähri Bäşimowa «Euronews» habar beriş teleýaýlymynyň wekiliýeti bilen duşuşdy. Duşuşygyň barşynda taraplar soňky on ýyllygyň dowamynda ýola goýlan netijeli hyzmatdaşlygy we onuň çäginde durmuşa geçirilen birnäçe taslamalary belläp geçdiler. Duşuşygyň netijeleri boýunça «Türkmenaragatnaşyk» agentligi bilen «Euronews» kompaniýasynyň arasynda Hyzmatdaşlyk hakynda Ylalaşyga gol çekildi.

5. Tatarystan Respublikasynyň Türkmenistandaky Medeniýet günlerine gatnaşyjylar Aşgabat şäherine geldiler. Döredijilik toparynyň düzümine Respublikanyň meşhur aýdymçylary, Döwlet halk sazlary ansambly, «Premýer» topary, režissýorlar, milli amaly-haşam we şekillendiriş sungatynyň öňdebaryjy ussatlary girýär. Tatarystan Respublikasynyň Türkmenistandaky Medeniýet günleriniň açylyş dabarasy şu gün Döwlet medeniýet merkeziniň Mukamlar köşgünde geçiriler.

Dünýäde

6. Ýaponiýanyň öňdebaryjy «Japan Airlines» awiakompaniýasynyň uçary içinde milli sport festiwalyna barýan 27 sany sumo göreşçisiniň bolandygy sebäpli uçup bilmedi. Sumo göreşçisiniň ortaça agramy 120 kg, bu ortaça ýapon ýolagçysynyň agramyndan has köpdür. Awiakompaniýa sumo göreşçileriniň festiwala gatnaşmaklary üçin olary ada alyp gitmek hem-de göreşçileriň öýlerine dolanmaklary üçin aýratyn uçuşlary guramak kararyna geldi.

7. Awstraliýaly ýetginjek Çarli Eggins Rubigiň kubigini iň çalt düzmek çempionatynda bu wezipäni 12 sekuntda tamamlady. Şol bir wagtyň özünde, rekordyň eýesine kubigi düzmek üçin bary-ýogy 7 sekunt gerek boldy, ilkinji bäş sekunt bu mehaniki tapmaçany öwrenmäge sarp edildi. Ýetginjek Rubigiň kubigini düzmek boýunça öňki netijesini ýarym sekunt gowulandyrdy.

Sport habarlary

8. Çernogoriýaly hünärmen Miodrag Božowiç türkmen tälimçisi Gurban Berdiýewiň işine ýokary baha berdi. Božowiçiň bellemegine görä, onuň Russiýadaky tälimçilik döwründe Berdiýew iň güýçli halypalaryň biri bolupdy. «Haçan-da men Russiýada işlänimde Gurban Berdiýewi iň gowy tälimçi hasaplaýardym. Ol iki gezek Russiýanyň çempiony boldy, şol döwürde örän güýçli bäsdeşlik gidýärdi. Ol «Barselonany» ýeňdi we «Rostow» bilen gowy netijeleri görkezdi. Gürrüňsiz, Berdiýew iň gowusy» diýip, Moskwanyň «Lokomotiw» we «Dinamo» toparlarynyň öňki tälimçisi belledi.

9. Türkmen wekiliýeti Aziýanyň boks konfederasiýasynyň Bangkokda geçirilen maslahatyna gatnaşdy. Maslahatda geçen ýylyň dowamynda geçirilen işleriň netijeleri, Aziýada boksy ösdürmegiň geljegi we 2024-nji ýylda Parižde geçiriljek Olimpiýa oýunlaryna türgenleriň taýýarlygy ara alnyp maslahatlaşyldy.

10. Futbol boýunça Türkmenistanyň Kubogyny almak ugrundaky çempionatyň ýarym final tapgyrynyň jogap duşuşyklary 18-nji dekabrda geçiriler. Ýeri gelende bellesek, ýurduň Kubogynyň 1/2 finalynyň ilkinji oýunlarynda «Arkadag» «Altyn asyry» 4:1 hasabynda ýeňip, finala çykmak üçin güýçli isleg bildirýändigini görkezdi. Beýleki duşuşykda ýurduň Kubogyň häzirki eýesi bolan «Ahal» «Merw» bilen 1:1 hasabynda deňme-deň oýnady.

11. Türkmenistan futbol boýunça milli ýygyndysynyň baş tälimçisi Mergen Orazow emirlikleriň «Şabab Al-Ahli» topary bilen geçirilen ýoldaşlyk duşuşygynyň netijelerine teswir berdi: «Ýoldaşlyk duşuşyklary biziň türgenleşiklerde gazanyp bilenlerimizi hem, kemçiliklerimizi hem görkezýär. Her bir duşuşykdan soň goýberýän ýalňyşlyklarymyzyň üstünde aýratyn işleýäris. Öňe ilerlemegiň ýeke-täk ýoly hem şu! «Şabab al-Ahli» bilen bolan duşuşyk bize haýsy kemçiliklerimizi düzetmelidigimizi görkezdi» diýip, Orazow belledi. Bu duşuşyk milli ýygyndynyň Dubaýdaky okuw-türgenleşik ýygnanyşygynyň çäklerinde geçirildi we ýer eýeleriniň peýdasyna 4:1 hasabynda tamamlandy. Mergen Orazowyň toparynyň indiki synag oýny 18-nji oktýabrda, çarşenbe güni geçiriler. Türkmenistanyň garşydaşy emirlikleriň «Ajmana» futbol topary bolar.