Şu gün Duşenbe şäherinde geçirilen Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň nobatdaky mejlisi geçirildi.

«Kazinform» halkara habarlar agentliginiň habar bermegine görä, sammitiň jemleri boýunça şu aşakdaky resminamalara gol çekildi:

— Araly halas etmegiň halkara gaznasyny esaslandyryjy döwletleriň Baştutanlarynyň Duşenbe Beýannamasy;

— Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň Täjigistanyň AHHG-na başlyklyk etmeginiň jemleri baradaky karary;

— Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň AHHG-niň gurluşyny we şertnamalaýyn-hukuk binýadyny kämilleşdirmek baradaky karary;

— Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň Gazagystanyň Prezidenti Kasym-Žomart Tokaýewiň 2024-2026-njy ýyllar üçin AHHG-niň başlyklygyna saýlanandygy baradaky karary.

Ozal habar berşimiz ýaly, Türkmenistanyň Prezidenti Serdar Berdimuhamedow Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň nobatdaky mejlisine gatnaşyp, onuň dowamynda Merkezi Aziýa Suw strategiýasyny döwrebaplaşdyrmagy, Merkezi Aziýada howanyň üýtgemegi bilen baglanyşykly tehnologiýalar boýunça Sebit merkezini döretmegi hem-de Araly halas etmegiň halkara gaznasynyň şertnamalaýyn-hukuk binýadyny kämilleşdirmegi teklip etdi.

Mundan başga-da, mejlisiň dowamynda Täjigistanyň Prezidenti Emomali Rahmon, Gazagystanyň Prezidenti Kasym-Žomart Tokaýew, Özbegistanyň Prezidenti Şawkat Mirziýoýew hem-de Gyrgyzystanyň Ministrler Kabinetiniň başlygynyň birinji orunbasary Adylbek Kasymaliýew çykyş etdi.