Girmek
Türkmenistanda
1. Aleksandr Beglowyň ýolbaşçylygyndaky Sankt-Peterburgyň Hökümetiniň wekiliýeti Aşgabat şäherine resmi sapar bilen geldi. Russiýanyň Demirgazyk paýtagtynyň ýolbaşçysy Türkmenistanyň Prezidenti Serdar Berdimuhamedow, şeýle hem türkmen halkynyň Milli Lideri Gurbanguly Berdimuhamedow bilen duşuşar. Taraplar ykdysady, ynsanperwer we durmuş ugurlary boýunça hyzmatdaşlyk etmegiň meselelerini, şeýle hem Sankt-Peterburgyň kompaniýalarynyň Türkmenistanda durmuşa geçirýän taslamalaryny ara alyp maslahatlaşarlar. Mundan başga-da, Sankt-Peterburgyň gubernatory täze Arkadag şäherine baryp görer we bu ýerde Sankt-Peterburgyň Hökümeti bilen Arkadag şäheriniň häkimliginiň arasynda hyzmatdaşlyk etmek hakynda Ylalaşyga gol çekiler.
2. Mary welaýatyň häkimligi Baýramaly şäherinde 24 sany dört gatly köp öýli ýaşaýyş jaýlaryny gurmak boýunça bäsleşik yglan etdi. Gurluşyk işleri ýaşaýyş toplumynyň meýilleşdirilen ikinji tapgyrynyň çäginde uzak möhletli bank karzlarynyň hasabyna amala aşyrylar. Täze jaýlar şäheriň merkezinde ýerleşer we umumy meýdany 40 müň inedördül metre barabar bolar. Her ýaşaýyş jaýynda bir otagly, iki otagly we üç otagly 8 öý bolar.
3. Türkmenistanda köpçülikleýin pagta ýygymyna girişildi. Möhüm oba hojalyk çäresi Ahal, Balkan, Lebap we Mary welaýatlarynda badalga aldy. Daşoguz welaýatynda, toprak-howa şertleri bilen baglylykda, pagta ýygymyna 15-nji sentýabrda girişiler. Şu ýylda ýurtda jemi 580 müň gektar ýere pagta ekildi hem-de 1,2 million tonnadan gowrak «ak altynyň» hasylyny ýygnamak meýilleşdirilýär.
5. Prezident Serdar Berdimuhamedow Marokkonyň Patyşasyna ýurtda bolup geçen hem-de köp sanly adam pidalaryna we şikes ýetmelerine, uly weýrançylyklara getiren güýçli ýertitreme zerarly gynanç hatyny iberdi. Döwlet Baştutany şu agyr pursatda Türkmenistanyň halkynyň we Hökümetiniň adyndan, şeýle hem hut öz adyndan, gurban bolanlaryň maşgalalaryna, dogan-garyndaşlaryna hem-de ýakynlaryna çuňňur gynanjyny we medet beriji sözlerini beýan etdi, ejir çekenlere bolsa tiz wagtda sagalmaklary baradaky dileglerini aýtdy.
Dünýäde
6. Nýu-Ýorkdaky Moda hepdeliginiň çäklerinde adaty bolmadyk moda görkezişi geçirildi. «Collina Strada» modalar öýi ähli beden gurluşyndaky, jynsdaky we ýaşdaky modelleri podiuma çykardy, şol bir wagtyň özünde olaryň ählisiniň ýüzünde tebigy däl ýylgyryş bardy. Görkezişiň dowamynda ýylgyryş modelleriň ýüzlerinden kem-kemden ýitdi – şeýtmek bilen olar hakykatda özlerini nähili duýandyklaryny görkezdiler.
7. Beýik Britaniýada täze durmuş guran ýaş çatynjalaryň maşgala durmuşy toýdan bir gün soň tortly edilen şowsuz degişme sebäpli nikany bozmak bilen tamamlandy. Toýdan öň gelin öýlenjek ýigide baýramçylyk tortlarynyň ýüze zyňylmagy bilen baglanyşykly degişmeleri halamaýandygyny duýdurdy. Ýigit duýduryşlara gulak asmady we toý dabarasynda gelniň ýüzüne tort böleklerini zyňyp, onuň baýramçylyk makiýažyny, saç bezegini we geýimini zaýalady. Gyz derrew dabaradan çykdy. Ýigidiň we gelniň garyndaşlarynyň gyzy köşeşdirjek bolup eden synanyşyklary netije bermedi. Göwnüne deglen gelin toýdan bir gün geçmänkä aýrylyşmak üçin ýüz tutdy, sebäbi öýlenjek ýigidiň özüniň haýyşlaryny diňläp bilmeýändigi we diňlemek islemeýändigi hakynda karara geldi.
Sport habarlary
8. Şymkentde 12 ýaşa çenli çagalaryň arasynda tennis boýunça Aziýanyň toparlaýyn çempionatynyň soňky tapgyry geçirilýär. Oglanlaryň arasynda geçirilýän ýaryşa Türkmenistanyň milli ýygyndysy gatnaşýar. Ýeri gelende bellesek, Türkmenistanyň milli ýygyndysy 2023-nji ýylyň iýun aýynda Aşgabatda geçirilen Merkezi Aziýa çempionatynda üstünlikli çykyş edip, finala gatnaşmaga hukuk gazanypdy. Toparçalaýyn tapgyrda türkmen toparyna Gonkongdan, Eýrandan we Taýlanddan deň-duşlary bäsdeşlik ederler.
9. Germaniýanyň futbol bileleşiginiň ýolbaşçylary Hans-Diter Fligi Germaniýanyň milli ýygyndysynyň baş tälimçisi wezipesinden boşatdylar. Bu wakadan bir gün öň Germaniýanyň milli ýygyndysy öz meýdançasynda geçirilen ýoldaşlyk duşuşygynda Ýaponiýanyň toparyndan 1:4 hasabynda ýeňildi. Hans-Diter Flik 2021-nji ýylyň maý aýyndan bäri Germaniýanyň milli ýygyndysyna ýolbaşçylyk edýärdi. Onuň ýolbaşçylygynda topar 2022-nji ýylda Katarda geçirilen dünýä çempionatynda toparçadan çykyp bilmedi.
10. Gazagystanyň futbol boýunça milli ýygyndysy 2024-nji ýylda geçiriljek Ýewropa çempionatynyň saýlama ýaryşynyň toparçalaýyn tapgyrynyň altynjy aýlawynda Demirgazyk Irlandiýanyň toparyndan 1:0 hasabynda üstün çykdy. Gazagystanyň milli ýygyndysy 6 duşuşykdan soň 12 utuk toplap, «H» toparçasynyň sanawynda ikinji orna çykdy. 2024-nji ýyldaky Ýewropa çempionaty Germaniýada geçiriler. Her saýlama toparçadan iň gowy çykyş eden iki topar ýaryşa gatnaşmaga hukuk gazanar. Ýaryşa gatnaşjak beýleki toparlar Milletler ligasynyň pleý-off tapgyrynyň netijeleri esasynda kesgitlener.