Girmek
Ozal habar berşimiz ýaly, şu günler Türkmenistanyň Telewideniýe, radiogepleşikler we kinematografiýa baradaky Döwlet komitetiniň Halkara habarlar merkeziniň hünärmenlerinden ybarat türkmen wekiliýeti Malaýziýada geçirilýän Ählumumy habarlar forumyna gatnaşýar.
Şu gün — 11-nji iýulda forum öz işini dowam etdirip, gün tertibine «Üýtgeýän köpçülikleýin habar beriş serişdeler ulgamyndaky üýtgeşmeler», «Häzirki zaman dünýäsinde emeli aňa bolan ynam», «Emeli aňyň etikasy» ýaly mowzuklar boýunça pikir alyşmalar boldy.
Şunuň bilen baglylykda, türkmen wekiliýetiniň agzalary hem-de dünýäniň dürli ýurtlarynyň köpçülikleýin habar beriş serişdeleriniň 180-e golaý wekilleri emeli aňyň metbugatda tutýan orny, emeli aňyň ornaşdyrylmagyndaky takyk maglumatlary, töwekgelçilikleri we päsgelçilikleri seljermek, şeýle hem howanyň üýtgemegi bilen baglanyşykly meseleleri ara alyp maslahatlaşdylar.
Mundan ozal, Aziýa-Ýuwaş ummany ýaýlym birleşmesiniň garamagyndaky, her ýylda 15 müň materiala golaý çap edýän «Asiavision» reýtinginiň 10 sany iň işjeň gatnaşyjysy kesgitlenilendigini habar beripdik. Türkmenistan gözden geçirilýän döwürde üç ýüze golaý makala ugradyp, abraýly yklymlaýyn reýtingde 7-nji basgançakdan ýer aldy.