Türkmenistanyň futbol klublarynyň üçüsi we bir futzal kluby Aziýanyň Futbol Konfederasiýasynyň klublaryň arasynda geçirýän bäsleşiklerinde (2023-2024 futbol möwsümi üçin) çykyş etmäge mümkinçilik berýän ygtyýarlandyrmany üstünlikli geçdiler.

Ýurdumyzyň geçen ýylky çempiony hem-de wise-çempiony “Ahal” bilen “Altyn Asyr” toparlary AFK-nyň Çempionlar ligasynda çykyş etmäge mümkinçilik berýän ygtyýarnamany almagy başardylar (“Altyn Asyr” topary bu möwsümde AFK-nyň Kubogynda çykyş edýändigine garamazdan, has çylşyrymly ygtyýarlandyrmany geçdi).

AFK-nyň Kubogynda çykyş etmäge mümkinçilik berýän ygtyýarlandyrmany geçen möwsüm futbol çempionatymyzy üçünji hatarda tamamlan “Merw” toparynyň geçendigini bellemek gerek. Bu toparlardan başga paýtagtymyzyň “Aşgabat” topary milli çempionatymyzda çykyş etmäge mümkinçilik berýän ygtyýarnamany geçdi.

Geçen möwsüm futzal boýunça ýurdumyzyň Naýbaşy ligasynda ikinji orny eýelän paýtagtymyzyň “Köpetdag” topary AFK-nyň futzal klublarynyň arasynda geçirýän halkara ýaryşyna gatnaşmaga mümkinçilik berýän ygtyýarnamany üstünlikli geçmegi başardy.

Klublary ygtyýarlandyrmaklyk Aziýanyň Futbol Konfederasiýasy hem-de Türkmenistanyň Futbol federasiýasy tarapyndan öňe sürülýän sport infrastrukturasyny, işgärler düzümini, administratiw, hukuk we maliýe talaplaryny klublar tarapyndan berjaý edilmegini gazanmakdan ybarat bolup durýar. Bu talaplaryň ýerine ýetirilmegi klublaryň professionallyk derejesi bilen birlikde ähli ugurlar boýunça alyp barýan işlerini aýdyňlaşdyryp, olara bolan ynam derejesini ýokarlandyrmaga kömek edýär.