Şu gün Prezident Serdar Berdimuhamedow obasenagat toplumyna gözegçilik edýän wise-premýer A.Ýazmyradowyň hem-de ýurduň welaýatlarynyň häkimleriniň gatnaşmagynda sanly ulgam arkaly iş maslahatyny geçirdi. Bu barada «Watan» habarlar gepleşiginde habar berildi.

Bellenilişi ýaly, iş maslahatynda ýurduň oba hojalyk toplumynda we sebitlerinde alnyp barylýan işleriň barşy bilen bagly meselelere seredildi.

Häkimler welaýatlarda alnyp barylýan möwsümleýin oba hojalyk işleriniň ýagdaýy barada hasabat berdiler.

Hasabatlarda galla oragynyň gidişi, bugdaýdan boşan meýdanlarda agrotehnikanyň kadalaryna laýyklykda sürüm işleriniň geçirilýändigi, gowaça ekilen ýerlerde ideg işleriniň ýerine ýetirilişi, döwlet Baştutanynyň tabşyrygyna laýyklykda, welaýatlarda ýazlyk ýeralma we beýleki gök-bakja önümleri bilen bazarlary bolelin üpjün etmek maksady bilen, şu günler ýetişdirilen hasyly ýitgisiz ýygnap almak boýunça degişli işleriň dowam edýändigi barada aýdyldy.

Degişli hasabatlarda Daşoguz welaýatynyň şaly ekilen meýdanlarynda häzirki wagtda suw tutmak işleriniň alnyp barylýandygy, Lebap welaýatynda şaly ekişiniň tamamlanyp, häzirki wagtda gögeriş alnan meýdanlarda agrotehnikanyň kadalaryna laýyklykda ideg işlerine girişilendigi, Mary welaýatynda bolsa gant şugundyrynyň ekişiniň guramaçylykly dowam edýändigi habar berildi.

Häkimler welaýatlarda Gurban baýramy mynasybetli geçiriljek çärelere taýýarlyk görlüşi, Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän dürli maksatly desgalardaky gurluşyk işleriniň barşy barada hem hasabat berdiler.

Prezident Serdar Berdimuhamedow hasabatlary diňläp, oba hojalyk işlerini ýokary hilli hem-de gysga wagtda, talabalaýyk ýerine ýetirmegiň möhüm talap bolup durýandygyna ünsi çekdi we häkimlere birnäçe anyk tabşyryklary berdi.

Soňra wise-premýer A.Ýazmyradow ýurtda dowam edýän oba hojalyk işleriniň barşy barada hasabat berdi.

Döwlet Baştutany hasabaty diňläp, häzirki wagtda oba hojalygynda örän jogapkärli hem-de möhüm möwsümiň dowam edýändigine ünsi çekdi we wise-premýere orak möwsümine gatnaşýan ähli düzümleriň bökdençsiz, sazlaşykly işledilmegini, orakdan boşan meýdanlarda sürüm işleriniň öz wagtynda, talabalaýyk geçirilmegini, gowaça idegiň agrotehniki möhletlerde ýerine ýetirilmegini berk gözegçilikde saklamagy tabşyrdy.

Prezident Serdar Berdimuhamedow iş maslahatyna gatnaşyjylara ýüzlenip, şu günler dowam edýän möwsümleýin oba hojalyk işleriniň ýokary guramaçylyk derejesinde geçirilmegi üçin ähli zerur tagallalaryň edilmelidigini belledi we bu babatda degişli tabşyryklary berdi.

Wise-premýer A.Ýazmyradow iş maslahatynyň dowamynda Prezident Serdar Berdimuhamedowy Medeniýet we sungat işgärleriniň hem-de Magtymguly Pyragynyň şygryýet güni, şeýle-de Gurban baýramy mynasybetli oba hojalyk toplumynyň işgärleriniň adyndan tüýs ýürekden gutlady.