27-nji aprelde Tokio şäherinde Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew bilen Ýaponiýanyň Halkara gatnaşyklar institutynyň baş direktory, professor Tomiko Içikawanyň arasynda duşuşyk geçirildi. Duşuşyga Türkmenistanyň Ýaponiýadaky ilçisi Atadurdy Baýramow we ýapon uniwersitetiniň beýleki wekilleri hem gatnaşdylar.

Taraplar duşuşygyň dowamynda geljegi uly ugurlarda konstruktiw we özara peýdaly hyzmatdaşlygy ýola goýup, akademiki we ylmy hyzmatdaşlygy ösdürmegiň mümkinçiliklernii ara alyp maslahatlaşdylar. Şunuň bilen baglylykda, bilelikdäki onlaýn leksiýalary, ylmy we akademiki alyş-çalyşlary, bilermenleriň derejesinde duşuşyklary hem-de gözleg neşirlerini guramagyň mümkinçilikleri göz öňünde tutulýar.

Duşuşyga gatnaşyjylar ýaşlar syýasatynyň durmuşa geçirilmegine, esasan hem, halkara ýaşlar hyzmatdaşlygy strategiýasyny durmuşa geçirmegiň çäginde türkmenistanly ýaşlaryň halkara gatnaşyklarynda tutýan ornuna aýratyn üns berdiler.

Taraplar ýaşlar syýasaty meselelerinde hyzmatdaşlygy dowam etdirmek we bu ugurda tejribe alyş-çalşygyny ýola goýmak barada ylalaşdylar.

2023-nji ýyl Türkmenistanda Arkadag Serdarly bagtly ýaşlar ýyly diýlip yglan edildi. Türkmenistanda alnyp barylýan özgertmelerde ýaşlaryň roluna aýratyn ünsi çekmegi maksat edinýän ýylyň şygary, bu meseleler boýunça döwletiň halkara gatnaşyklardaky eýeleýän ornuna laýyk gelýär. Ýurduň mundan beýläk-de yzygiderli we hemmetaraplaýyn durmuş-ykdysady ösüşinde, dünýä arenasyndaky öňdebaryjy orunlaryny berkitmekde ýaşlaryň ägirt uly kesgitleýji orny göz öňünde tutulyp, ýaşlar syýasaty milli we döwlet bähbitleriniň ileri tutulýan ugry bolup durýar.

Türkmenistanyň Prezidenti tarapyndan alnyp barylýan ýaşlar syýasaty, ýaş türkmen raýatlarynyň emele gelmegi, ösmegi we şahsy ösüşi üçin iň amatly şertleri döretmäge, intellektual, döredijilik we ruhy mümkinçiliklerini jemgyýetiň bähbitlerine has köp durmuşa geçirmek üçin mümkinçilikleri giňeltmäge itergi berýär.