Girmek
Türkmenistanyň hokkeý federasiýasy ýurduň milli ýygyndysynyň Kazan şäheriniň «Ak Bars» toparynyň hokkeýçileri bilen ýoldaşlyk duşuşygyny geçirjekdigini habar berdi.
Duşuşyk 7-nji aprel güni Aşgabatdaky Sportuň gyşky görnüşleri toplumynda geçiriler. Ol sagat 16:00-da başlanar.
Duşuşyga tomaşa etmek isleýän sport janköýerlerine petekleri toplumyň kassasyndan satyn alyp boljakdygy habar berilýär.
Bu duşuşyk Türkmenistanyň hokkeý ýygyndysy üçin 17 ― 23-nji aprel aralygynda GAR-da geçiriljek dünýä çempionatynyň üçünji dwizionyna taýýarlygyň möhüm tapgyryna öwrüler. Şol günlerde Türkmenistanyň at gazanan tälimçisi Baýram Allaýarowyň şägirtleri dünýä çempionatynyň bir basgançak ýokardaky dwizionyna çykmak üçin Lýuksemburgyň, Tailandyň, Taýwanyň we GAR-yň ýygyndylary bilen güýç synanyşarlar.
Tatarystanyň «Ak Bars» hokkeý toparynyň wekilleriniň şu günler Aşgabat şäherinde saparda bolýandygyny ýatladýarys.
Sportuň gyşky görnüşleri toplumynyň paýtagtyň Atatürk we Oguzhan köçeleriniň çatrygynda ýerleşýändigini dykgatyňyza ýetirýäris. Doly maglumatlary (+993 12) 21 26 58; (+993 12) 21 26 74 belgili telefonlara jaň edip alyp bilersiňiz.