Şu gün Türkmenistanda Saýlawlary we sala salşyklary geçirmek boýunça Merkezi topary mejlis geçirdi. Onda Mejlisiň deputatlarynyň, welaýat, etrap, şäher halk maslahatlarynyň we Geňeşleriň agzalarynyň ählihalk saýlawlarynyň gutarnykly netijeleri jemlenildi.

«Watan» habarlar gepleşiginde berlen habara görä, saýlaw möwsüminiň ähli tapgyrlary hereket edýän milli kanunçylyga we umumy ykrar edilen halkara kadalaryna laýyklykda guraldy. Ses bermek saýlaw okruglaryň çäklerindäki 2602 saýlaw uçastoklarynda geçirildi. Türkmenistanyň daşary ýurtlardaky raýatlarynyň ses bermekleri hem guramaçylykly geçirildi. Türkmenistanyň ilçihanalarynyň we konsullyk edaralarynyň ýanynda 42 saýlaw uçastogy açyldy.

Merkezi saýlaw toparynyň maglumatlaryna görä, Mejlisiň deputatlarynyň, halk maslahatlarynyň we Geňeşleriň agzalarynyň saýlawlarynda Türkmenistanyň ses bermäge hukugy bolan raýatlarynyň 91,12 göterimi ses berdi.

Aşgabadyň hem-de welaýat saýlaw toparlarynyň teswirnamalarynyň esasyndaky maglumatlara görä, tutuş ýurt boýunça — 258 dalaşgärden Türkmenistanyň Mejlisiniň täze çagyrylyşynyň 125 deputatynyň saýlanandygy;

• 2516 dalaşgärden, 240 welaýat we 960 etrap hem-de şäher halk maslahatlarynyň agzalarynyň;
• 12 müň 98 dalaşgärden 5 müň 897 Geňeş agzalarynyň saýlanandygy yglan edildi. Ähli saýlaw okruglarynda bir ýere iki we şondan köp dalaşgär dalaş etdi.

Ozal habar berşimiz ýaly, saýlaw möwsüminiň ähli tapgyryna 3 müňe golaý milli synçy syn etdi.