Türkmenistanyň futbol çempionatynyň 6-njy tapgyrynda Mary şäherinde ýaryş tertibiniň aşaky orunlaryny eýeleýän iki toparyň ― «Energetik» bilen «Nebitçiniň» özara duşuşygy boldy. Duşuşykdan öň «Energetik» altynjy, «Nebitçi» bolsa iň soňky orny eýeleýärdi.

Duşuşyk Ezizmämmet Orazmämmedowyň hem-de Musa Nurnazarowyň (11 m.j.u.) geçiren gollary bilen maryly futbolçylaryň peýdasyna 2:1 hasabynda tamamlandy. «Nebitçiniň» ýeke-täk pökgüsini bolsa 11 metrlik jerime urgusyndan Serdar Annaorazow geçirdi.

Bu ýeňişden soň utugyny 7-ä çykaran «Energetik» bäşinji orna beýgeldi. 6 utukly «Köpetdag» bolsa altynjy orna düşdi. 3 utukly «Nebitçi» ahyrky orny eýeleýär.

Birinji aýlawyň ahyrky tapgyrynda «Nebitçi» 30-njy awgust güni «Altyn asyry» kabul eder, «Energetik» bolsa şol gün myhmançylykda «Köpetdag» bilen duşuşar.