Girmek
Türkmenistanyň futbol boýunça ýaşlar ýygyndysynyň baş tälimçisi Ahmet Agamyradow topary Aziýanyň kubogy ― 2022-de Eýranyň ýygyndysyna garşy ajaýyp oýny orta goýandygyny nygtady.
Duşenbe güni Daşkent şäherinde geçirilen duşuşygyň türkmen ýygyndysynyň peýdasyna 2:1 hasabynda tamamlanandygyny ýatladýarys. Bu ýeňiş, türkmen ýygyndysyna ilkinji 3 utugyny gazanyp, ýaryşyň çärýek finalyna çykmak üçin gowy mümkinçilik döretdi.
― Biz Aziýanyň kubogynda ilkinji ýeňşimizi gazandyk. Men bu üstünlige diýseň begenýärin. Oglanlar gowy oýnadylar. Indi bolsa diňe Katar bilen boljak oýun barada pikirlenmeli, indiki tapgyra çykmak üçin elimizden gelenini gaýgyrmaly däl.
Ýeňiş ýygyndylaryň ikisi üçin hem möhümdi. Haýsy toparyň has güýçlüdigi barada bolsa jedel etmek manysyz. Men Türkmenistanyň hem, Eýranyň hem deň güýçdedigine ynanýaryn. Ýeke-täk tapawut, mümkinçiliklerimize takyk göz ýetirip, türkmen futbolynyň taryhyny özgertdik.
Elbetde, duşuşykdan soň biziň geýim çalşylýan otagymyz baýramçylyga öwrüldi. Eýrandan üstün çykanymyza ählimiz begendik. Men oglanlara bu pursatdan lezzet almaga rugsat berdim, sebäbi olar muňa mynasyp. Şeýle-de bolsa, bu ýeňşi ýatdan çykaryp, Katar bilen boljak oýna üns bermelidigini aýtdym.