Girmek
Türkmenistanyň futbol boýunça milli ýygyndysynyň Dünýä çempionaty ― 2022-niň ikinji saýlama tapgyryndaky topardaşy bolan Koreýa Respublikasynyň ýygyndysy mart aýynda Ýaponiýanyň ýygyndysy bilen ýoldaşlyk duşuşygyny geçirer.
Duşuşyk 25-nji martda Ýokohoma şäherindäki (Ýaponiýa) «Nissan» stadionynda meýilleşdirilýär. Şu wagta çenli iki milli ýygyndy biri-biri bilen 79 gezek duşuşdy. Yzda galan oýunlarda Koreýa Respublikasynyň 42, Ýaponiýanyň 14 ýeňşi bar. 23 duşuşyk bolsa deňme-deňlik bilen tamamlandy.
Şeýlelikde koreýaly futbolçylar koronowirus pandemiýasy bilen bagly çäklendirmeler güýçlendirilensoň, 2020-nji ýylyň dekabr aýyndan bäri Ýaponiýa barjak ilkinji milli ýygyndy bolar.
Türkmenistanyň we Koreýa Respublikasynyň futbol ýygyndylary Dünýä çempionatynyň yklymlaýyn saýlama ýaryşynyň «H» toparçasyna wekilçilik edýär. Bu toparçada KHDR-nyň, Liwanyň we Şri-Lankanyň ýygyndylary hem bar.