Türkmenistanyň we Gruziýanyň daşary işler ministrleriniň wideomaslahat görnüşinde duşuşygy boldy — diýip, TDH habar berýär.

Gepleşikleriň barşynda ministrler ikitaraplaýyn gün tertibiniň birnäçe möhüm meselelerini ara alyp maslahatlaşdylar hem-de iki ýurduň arasyndaky syýasy-diplomatik gatnaşyklaryň ýokary derejesini nygtadylar. Bellenilişi ýaly, Türkmenistan bilen Gruziýa halkara guramalaryň, hususan-da, Birleşen Milletler Guramasynyň çäklerinde üstünlikli hyzmatdaşlyk edýärler.

Taraplar daşary syýasat edaralarynyň arasynda pudagara geňeşmeleriň dowam etdirilmeginiň zerurdygyny nygtadylar. Ministrler bilelikdäki ulag-üstaşyr geçelgeleriniň ösdürilmegi boýunça hyzmatdaşlyk meselelerine garadylar.

“Hazar deňzi — Gara deňzi” halkara ulag geçelgesi taslamasyny işjeňleşdirmek hem-de onuň kadalaşdyryjy-hukuk binýady bilen bagly meselelere aýratyn üns berildi. Şeýle hem sebitara söwda-ykdysady hyzmatdaşlygy ilerletmek nukdaýnazaryndan “Lapis Lazuli” taslamasynyň ähmiýeti nygtaldy. Awtomobil ýollarynyň hem-de deňiz portlarynyň netijeli ulanylmagy arkaly bökdençsiz ýük daşalmagyny üpjün etmegiň möhümdigi bellenildi.

Şunuň bilen baglylykda, Ykdysady hyzmatdaşlyk boýunça bilelikdäki türkmen-gruzin hökümetara toparynyň nobatdaky mejlisiniň geçirilmeginiň zerurdygy barada aýdyldy. Şeýle hem wideomaslahatyň çäklerinde medeni-ynsanperwer hyzmatdaşlygy işjeňleşdirmegiň mümkinçilikleri ara alnyp maslahatlaşyldy.