Şu ýylyň alty aýynda Lebap welaýatynda öndürilen senagat önümleriniň hereket edýän nyrhlardaky möçberi 7 milliard 166 million 539 müň manada barabar boldy ― diýip, «Türkmen gündogary» gazeti habar berýär.

Şonda önümleriň diňe 2 milliard 135 million 682 müň manatlygynyň döwlet eýeçiligindäki senagat kärhanalarynda öndürilendigi bellärliklidir. Munuň özi möhüm pudakda hususy önüm öndürijileriň paýynyň barha artýandygyndan habar berýär.

2019-njy ýylyň degişli döwri bilen deňeşdirilende öndürilen önümleriň möçberiniň ýokary artyş depgini elektrik energetikasynda, himiýa, ýeňil senagatynyň kärhanalarynda emele geldi.