Baş tälimçi Wladimir Baýramowyň ýolbaşçylygyndaky «Arkadag» futbol kluby Türkmenistanyň çempionatynyň 20-nji tapgyrynyň başga senä geçirilen duşuşygynda «Aşgabat» toparyndan 3:0 hasabynda üstün çykyp, milli çempionatyň çäklerinde yzly-yzyna 100-nji ýeňşini gazandy.

Ýubileý duşuşygy çarşenbe güni Aşgabatdaky «Nusaý» stadionynda geçirildi. Ýeňiji toparyň düzüminde gollary Altymyrat Annadurdyýew (19-njy minut), Didar Durdyýew (63-nji minut) we Welmyrat Ballakow (67-nji minut) geçirdi.

«Arkadag» 2023-nji ýylda esaslandyryldy we Türkmenistanyň üç gezek çempiony boldy (2023, 2024, 2025). Topar ilkinji möwsüminde 24, ikinji möwsüminde 30, geçen möwsümde bolsa 28 ýeňiş gazandy. Häzirki 2026-njy möwsüminde klub yzly-yzyna geçirilen ilkinji 18 duşuşygyň ählisinde ýeňiş gazandy.

«Aşgabat» toparyny ýeňenden soň «Arkadag» 54 utuk toplap, ýaryş tertibinde uly aratapawut bilen öňdeligi eýeleýär. Ýaryş tertibindäki iň ýakyn toparlar — «Ahal» (36 utuk) we «Altyn Asyr» (35 utuk).

Häzirki wagtda türkmen kluby AFK-2 Çempionlar ligasynyň toparçalaýyn tapgyryna taýýarlyk görýär. «B» toparçada «Arkadagyň» garşydaşlary BAE-niň «Al-Jazira», Eýranyň «Gol Gohar» we Bahreýniň «Al-Muharrak» klublary bolar.

Ýaryşyň toparçalaýyn tapgyrynda jemi 32 klub çykyş eder. Olar sekiz toparça bölüner, Günbatar we Gündogar zolaklarynyň hersinde dört toparça bolar. Her toparçadan iň gowy iki klub pleý-off tapgyryna çykar. Toparçalaýyn tapgyryň ilkinji duşuşyklary 15–17-nji sentýabrda geçiriler, ýaryşyň final duşuşygy bolsa 2027-nji ýylyň 15-nji maýynda bolar.