Türkmenistanyň ýygyndy topary 19–20-nji awgustda Aşgabatda geçirilen ýetginjekleriň arasynda rapid we blis boýunça halkara «Kids Expo Chess Cup 2026» ýaryşynda 24 medal gazandy. Ýaryş FIDE-niň kadalarynyň esasynda şahsy bäsleşik görnüşinde geçirilip, netijeler halkara reýtingiň hasabyna girizildi.

Ýaryşa sekiz ýurtdan — Azerbaýjandan, Eýrandan, Gazagystandan, Gyrgyzystandan, Täjigistandan, Türkmenistandan, Türkiýeden we Özbegistandan 94 ýaş küştçi gatnaşdy. Umumylykda 36 medal ugrunda bäsleşildi.

Türkmenistanyň gazanan medallarynyň arasynda 7 altyn, 9 kümüş we 8 bürünç medal bar. Şeýlelikde, Türkmenistanyň ýygyndy topary medal sanawy boýunça birinji orny eýeledi.

Türgenler oglanlaryň we gyzlaryň arasynda 8 ýaşa çenli, 10 ýaşa çenli we 12 ýaşa çenli alty ýaş derejesinde rapid boýunça ýedi, blis boýunça bolsa dokuz tapgyr oýnadylar.

Ýaryşyň beýleki medallaryny Eýranyň, Gazagystanyň, Özbegistanyň we Azerbaýjanyň wekilleri paýlaşdylar.

Türkmenistanyň Küşt federasiýasynyň başlygy Wepa Mälikgulyýew: «Aşgabat şu günlerde mekdep okuwçylarynyň we çagalaryň küşt oýnunyň dünýä paýtagtyna öwrüldi. «Kids Expo Chess Cup 2026» bu ýaş derejelerinde Türk küşt birleşiginiň howandarlygynda geçirilen ilkinji ýaryş hökmünde hem taryha girdi. Ýeňijileri we baýrakly orunlara mynasyp bolanlary gutlaýaryn, şeýle hem küşt baýramynyň hakyky şowhunyna goşant goşan ýaş türgenlere, tälimçilere, ene-atalara we halkara hyzmatdaşlarymyza minnetdarlygymy bildirýärin» — diýip, öz gutlagynda belledi.

Ýeri gelende ýatlatsak, ýaryşyň guramaçylary we hyzmatdaşlary — Türkmenistanyň Söwda-senagat edarasy, Türkmenistanyň küşt federasiýasy, Küşt mekdepleriniň halkara federasiýasy, Türk küşt birleşigi, Gazagystanyň küşt federasiýasynyň Freedom Asian Chess Initiatives (FACI) maksatnamasy hem-de TurkmenExpo kompaniýasy. Ýaryş FIDE we Küşt mekdepleriniň halkara federasiýasy tarapyndan yglan edilen «Bilimde küşt ýyly — 2026» çäresiniň çäklerinde geçirildi.