Türkmenistanyň kitap okamak üçin niýetlenen sanly «elkitap» hyzmaty 19–22-nji awgust aralygynda Aşgabatda geçirilýän «Kids Expo 2026: Ähli zat çagalar üçin» atly halkara sergi-ýarmarkasyna gatnaşdy.

Işläp düzüjileriň maglumatlaryna görä, «elkitap» App Store we Google Play platformalarynda «Kitaplar» kategoriýasynda birinji orunda durýar. Hyzmatyň ulanyjylarynyň sany 12 500-e ýetip, bu görkeziji barha artýar.

Sergide «elkitap» topary programmanyň soňky täzelenmeleriniň biri bolan eCoins ulgamyny hödürledi. Bu ulgam kitap okamak işine oýun elementlerini goşýar. Ulanyjylar okalan her bir sahypa üçin eCoins gazanýarlar, öz ösüşlerini yzarlap bilýärler we iň işjeň okyjylaryň reýtinginde has ýokary orun üçin bäsleşýärler.

Taslamany döredijileriň bellemeklerine görä, täzeligiň maksady kitap okamagy häzirki zaman endigine öwürmek we ulanyjylary has köp okamaga höweslendirýän sanly gurşawy döretmekden ybarat. Işläp düzüjileriň sözlerine görä, eCoins bu ugurdaky ädimleriň diňe biridir. Geljekde hyzmatda ýene-de birnäçe täzelenmäniň durmuşa geçirilmegine garaşylýar.