11–18-nji awgust aralygynda Moskwada Garaşsyz Döwletleriň Arkalaşygyna (GDA) agza ýurtlaryň ýetginjekler ýygyndylarynyň arasynda dünýä çempiony Mihail Botwinnigiň Açyk halkara Kubogy ugrundaky altynjy ýaryş geçiriler. Bu ýaryş Küşt federasiýalarynyň assosiasiýasy tarapyndan GDA gatnaşyjy ýurtlaryň Döwletara ynsanperwer hyzmatdaşlyk gaznasynyň (DYHG) goldaw bermeginde guralýar.

DYHG-nyň metbugat gullugynyň habar bermegine görä, ýaryşa Azerbaýjanyň, Ermenistanyň, Belarusuň, Gazagystanyň, Gyrgyzystanyň, Russiýanyň, Täjigistanyň, Türkmenistanyň we Özbegistanyň ýygyndy toparlary gatnaşarlar. Ýaryş aýlaw ulgamy boýunça dokuz tapgyrda geçiriler. Oýunlar nusgawy wagt gözegçiliginde oýnalar: her küştçä bir oýun üçin 90 minut wagt berilýär we ilkinji göçümden başlap her göçüm üçin goşmaça 30 sekunt goşular. Ýaryşyň ähli duşuşyklary internet arkaly göni ýaýlymda görkeziler.

Her topara grossmeýster derejesindäki kapitan ýolbaşçylyk eder. Toparyň düzümine 14 ýaşa çenli üç oglan we bir gyz küştçi girýär. Şeýle hem kapitanlar beýleki toparlaryň ýaş küştçüleri bilen sagat bellemek bilen bir wagtyň özünde birnäçe garşydaş bilen oýun tapgyrlaryny geçirerler. Kapitanyň gazanan utuklary toparyň beýleki agzalarynyň utuklary bilen jemlenip, toparyň umumy netijesi kesgitlener.