Hindistanyň Aşgabatdaky ilçihanasy wekilhananyň binasynda hem-de paýtagtdaky «Bagtyýarlyk» sport toplumynda yzygiderli ýoga sapaklaryny geçmek üçin ýerli ýoga hünärmenini işe kabul etmek boýunça resminamalaryň kabul edilýändigini yglan etdi. Bu barada diplomatik wekilhananyň habarynda aýdylýar.

Bildirilýän talaplara görä, dalaşgär 25–50 ýaş aralygynda bolmaly, ýokary bilimli, beden we akyl taýdan sagdyn bolmaly, şeýle hem rus, türkmen we iňlis dillerini erkin bilmeli.

Dalaşgär azyndan üç ýyllyk ýokary bilime we ýoga mugallymy hökmünde azyndan üç ýyllyk iş tejribesine eýe bolmaly ýa-da ykrar edilen okuw mekdebinden ýa-da ussat mugallymdan (gurudan) azyndan iki ýyllyk ýoga okuwyny tamamlandygyny tassyklaýan diplomy ýa-da şahadatnamasy hem-de azyndan dört ýyllyk iş tejribesi bolmaly. Mundan başga-da, ýoganyň taryhy we pelsepesi boýunça ýeterlik derejede biliminiň bolmagy talap edilýär.

Ilçihananyň habarynda bellenilişi ýaly, kompýuter bilen işlemek endikleri, şol sanda audio we wideo materiallary ýazga almak hem-de olary kebşirlemek başarnygy, görkezme çykyşlaryny we okuw sapaklaryny geçirmek boýunça tejribe, şeýle hem başlangyç bilen çykyş etmek we okuwçylary ýokary netijeleri gazanmaga höweslendirmek ukyby dalaşgär üçin artykmaçlyk hasaplanar.

Gyzyklanma bildirýän dalaşgärler arzasyny, terjimehalyny, iş tejribesi we bilimi baradaky maglumatlary şu salgy boýunça ibermelidirler: Hindistanyň ilçihanasy, Halkara işewürlik merkezi, Ýunus Emre köçesi 1, Parahat 2/1, poçta gutusy №80, Aşgabat – 744017, Türkmenistan.

Goşmaça maglumatlary iş günlerinde sagat 09:00-dan 13:00-a çenli we 14:00-dan 17:30-a çenli aralykda 45-61-52, 45-61-53 telefon belgileri, şeýle hem int.ashgabat@mea.gov.in we pic.ashgabat@mea.gov.inelektron poçta salgylary arkaly alyp bolýar.

Ilçihananyň habarynda bellenilişi ýaly, resminamalary tabşyrmagyň iň soňky möhleti 2026-njy ýylyň 14-nji awgustydyr.