Türkmenistanyň daşary işler ministriniň orunbasary Ahmet Gurbanow 31-nji iýulda Astana şäherinde geçirilen «Merkezi Aziýa – Koreýa Respublikasy» hyzmatdaşlyk forumynyň ýokary wezipeli wekilleriniň üçünji mejlisine gatnaşdy.

Türkmenistanyň DIM-iniň habar bermegine görä, mejlisiň gün tertibine laýyklykda, gatnaşyjylar öňde duran «Merkezi Aziýa – Koreýa Respublikasy» sammitine, şol sanda jemleýji resminamanyň taslamasyna taýýarlyk görmek meselelerine seretdiler.

Türkmenistanyň daşary işler ministriniň orunbasary öz çykyşynda Merkezi Aziýa döwletleri bilen Koreýa Respublikasynyň arasynda özara bähbitli hyzmatdaşlygy ösdürmegiň möhümdigini nygtap, ýurduň forumyň çäklerinde köptaraply gatnaşyklary mundan beýläk-de berkitmäge ygrarlydygyny tassyklady.

«Merkezi Aziýa – Koreýa Respublikasy» sammitiniň hem-de işewürlik-sammitiniň geçirilmeginiň sebitiň ýurtlary bilen Koreýa Respublikasynyň arasyndaky köpugurly hyzmatdaşlygy mundan beýläk-de berkitmekde uly ähmiýete eýedigi bellenildi. Bu çäreler işewürlik wekilleriniň arasynda täze göni aragatnaşyklary ýola goýmaga, bilelikdäki taslamalary durmuşa geçirmek üçin mümkinçilikleri giňeltmäge, şeýle hem senagat, energetika, ulag we logistika, sanly tehnologiýalar, oba hojalygy we özara bähbitli beýleki ugurlarda hyzmatdaşlygyň geljegi uly ugurlaryny kesgitlemäge ýardam eder.

Şol gün Türkmenistanyň daşary işler ministriniň orunbasary Ahmet Gurbanowyň Koreýa Respublikasynyň daşary işler ministriniň orunbasary hanym Çun Eý-he bilen duşuşygy geçirildi.

Söhbetdeşligiň barşynda Türkmenistanyň köpýyllyk dostluk, özara ynam, hormat goýmak we düşünişmek ýörelgelerine esaslanýan türkmen-koreý hyzmatdaşlygyny mundan beýläk-de ösdürmäge uly ähmiýet berýändigi bellenildi.

Bu babatda ikitaraplaýyn gatnaşyklaryň taryhynda yzygiderli aýratyn orun eýeleýän ýokary derejedäki saparlaryň we aragatnaşyklaryň aýratyn ähmiýeti barada nygtaldy.

Şeýle-de söhbetdeşler «Merkezi Aziýa – Koreýa Respublikasy» sammitine taýýarlyk görmegiň wajyp meselelerini maslahatlaşdylar.