Özbegistanyň ýygyndysynyň hüjümçisi Eldor Şomurodowyň 2026-njy ýylyň futbol boýunça dünýä çempionatynda geçiren goly janköýerleriň ses bermeginiň netijelerine görä, ýaryşyň iň gowy goly ugrundaky ses berlişikde ikinji orny eýeledi. Bu barada Halkara futbol federasiýasynyň (FIFA) resmi saýtynda habar berildi.

Birinji orny Kabo-Werdeniň milli ýygyndysynyň goragçysy Sidni Lopeş Kabral eýeledi. Ol 1/16 final duşuşygynda Argentinanyň derwezesine gol geçiripdi. Onuň oýnuň 103-nji minutynda geçiren goly hasaby deňläpdi — 2:2, emma Kabo-Werdeniň ýygyndysy goşmaça wagtda 2:3 hasabynda ýeňilipdi.

Ses berlişikde üçünji orna Gaitiniň milli ýygyndysynyň hüjümçisi Uilson Izidor mynasyp boldy.

Şomurodowyň goly toparçalaýyn tapgyryň üçünji duşuşygynda Kongo Demokratik Respublikasynyň milli ýygyndysyna garşy geçirilen oýunda derwezä girizilipdi. Şol duşuşykda Özbegistanyň ýygyndysy 1:3 hasabynda ýeňlip, utuk gazanyp bilmän, dünýä çempionatyndaky çykyşyny tamamlapdy. Milli ýygyndynyň kapitany 10-njy minutda ýiti burçdan derwezä urgy geçirip, pökgini derwezeçiniň üstünden aşyrmak bilen hasaby açdy. Bu gol toparçalaýyn tapgyryň iň gowy goly diýlip ykrar edildi.

Baýrak ugrunda göreşmek üçin FIFA jemi 12 goly saýlap aldy. Ýeňiji 48 sagat dowam eden janköýerleriň ses bermeginiň netijesinde kesgitlenildi. Kabraldan, Şomurodowdan we Izidordan başga-da, dalaşgärleriň hatarynda Elaýja Jast (Täze Zelandiýa), Kilian Mbappe (Fransiýa), Lionel Messi (Argentina), Kerim Alaýbegowiç (Bosniýa we Gersegowina), Daýzen Maeda (Ýaponiýa), Erling Holand (Norwegiýa), Hulian Alwares (Argentina), Jud Bellingem (Angliýa) hem-de Ferran Torres (Ispaniýa) bardy. Torresiň finalda geçiren ýeňiş goly Ispaniýanyň milli ýygyndysyna goşmaça wagtda Argentinany 1:0 hasabynda ýeňmäge we dünýä çempiony bolmaga ýardam etdi.

2026-njy ýylyň futbol boýunça dünýä çempionaty 19-njy iýulda tamamlandy. Bu ýaryş ilkinji gezek 48 milli ýygyndynyň gatnaşmagynda ABŞ-da, Kanadada we Meksikada geçirildi. Dünýä çempiony Ispaniýanyň milli ýygyndysy boldy.