Türkmenistanda oýun arkaly öwretmäge, gözleg işine we kiçi ýaşly çagalara gönükdirilen okuw usullaryna aýratyn üns berýän mekdebe çenli bilimi kämilleşdirmek boýunça iki günlük seminar we maslahat beriş okuwy geçirilýär.

Seminar ÝUNISEF tarapyndan Türkmenistanyň Bilim ministrligi bilen hyzmatdaşlykda guraldy. Oňa Bilim ministrliginiň, Türkmenistanyň Milli bilim institutynyň, mugallymçylyk mekdepleriniň we ýokary okuw mekdepleriniň wekilleri, ýurduň dürli künjeklerinden mekdebe çenli bilim ulgamynyň hünärmenleri, şeýle hem bilim işgärleriniň hünärini kämilleşdiriş merkezleriniň işgärleri gatnaşýarlar.

Seminary ÝUNISEF-iň halkara bilermeni, irki ýaşdaky çagalary terbiýelemek we okatmak ulgamynda belli alym hem-de bilim syýasaty boýunça hünärmen Kristian Fabbi alyp barýar.

Onuň saparynyň çäklerinde Aşgabatdaky çagalar baglaryna baryp görmek, şeýle hem milli hyzmatdaşlar bilen çagalar baglarynyň terbiýeçileriniň ýokary okuw mekdebine çenli we ýokary okuw mekdebinden soňky taýýarlygyny kämilleşdirmek meseleleri boýunça maslahat beriş okuwyny geçirmek göz öňünde tutulýar.

Gatnaşyjylar şeýle hem Türkmenistandaky mekdebe çenli bilim edaralarynda ulanylýan häzirki tejribeleri seljererler hem-de mugallymlary taýýarlamak boýunça okuw maksatnamalaryny täzeden gözden geçirmek işini ara alyp maslahatlaşarlar.