Bütindünýä Saglygy Goraýyş Guramasy (BSGG) «MV Hondius» kruiz gämisinde başlan we hantawirus bilen bagly ýagdaýyň tamamlanandygyny yglan etdi. Bu barada «BBC News» habar berýär.

​BSGG-niň Baş direktory Tedros Adhanom Gebreýesusyň belleýşi ýaly, gäminiň kesellänler bilen aragatnaşykda bolan iň soňky ýolagçysy hem karantin möhletini tamamlady, hantawirus barlagyndan geçdi we öýüne dolandy. 25-nji maýdan bäri kesellemegiň täze ýagdaýlary hasaba alynmady. Guramanyň ýolbaşçysy: «BSGG hantawirus ýokanjynyň tamamlanandygyny yglan edýär» — diýip beýan etdi.

​Waka 1-nji aprelde Argentinadan ýola düşen «MV Hondius» kruiz gämisinde başlanypdy. Şol wagt gämide 23 ýurtdan 147 ýolagçy we ekipaž agzalary bardy.

​Keseliň ilkinji alamatlary 6-njy aprelde ýolagçylaryň birinde ýüze çykdy — ol soňra gäminiň içinde ýogaldy. Onuň aýaly hem keselledi we Günorta Afrika Respublikasyna (GAR) äkidilenden soň aradan çykdy. BSGG-niň maglumatlaryna görä, gämi saparyndan öň bu maşgala Argentinada, Çilide we Urugwaýda ornitalogik (guşlary öwreniş) syýahatda bolupdyrlar. Olaryň syýahat ugry wirusy ýaýradyjy gemrijileriň ýaşaýan ýerlerinden geçipdir.

​10-njy maýda gämi Tenerifä (Ispaniýa) geldi. Ol ýerde ýolagçylaryň we ekipaž agzalarynyň köpüsi gämiden düşürildi we soňra öz ýurtlaryna ugradyldy.

​Jemi bu ýokanç zerarly 13 adam keselledi, olaryň üçüsi aradan çykdy. Keseliň sebäpkäri hantawirusyň seýrek duş gelýän «And» görnüşi bolup çykdy.