Şu gün Aşgabatda Türkmenistanyň we Gazagystan Respublikasynyň daşary işler ministrleriniň derejesinde syýasy geňeşmeler geçirildi. Diplomatlar hoşniýetli goňşuçylyk we özara hormat goýmak ýörelgeleri esasynda guralýan döwletara hyzmatdaşlygynyň esasy ugurlaryna garadylar. Bu barada Türkmenistanyň DIM-iniň metbugat gullugy habar berdi. 

Syýasy-diplomatik ugruň çäginde iki döwletiň Baştutanlary tarapyndan kesgitlenilýän ikitaraplaýyn gatnaşyklaryň ýokary depgini bellenildi. Jemgyýetçilik diplomatiýasynyň iň möhüm guraly hökmünde parlamentara gatnaşyklary işjeňleşdirmäge aýratyn üns berildi. Ministrler garaýyşlary dessin utgaşdyrmaga mümkinçilik berýän daşary syýasat edaralarynyň arasyndaky yzygiderli geňeşmeleriň mehanizmine ýokary baha berdiler. Ählumumy gün tertibi ara alnyp maslahatlaşylanda, köptaraplaýyn başlangyçlary özara goldamak arkaly BMG-de we beýleki abraýly halkara guramalarda ýakyn hyzmatdaşlyk etmäge ygrarlylyk tassyklanyldy.

Söwda-ykdysady hyzmatdaşlyga ünsi çekip, taraplar özara söwdanyň göwrümini artdyrmak we söwda dolanyşygyny diwersifikasiýalaşdyrmak boýunça öňde durýan wezipeleri kesgitlediler. Ilkinji nobatdaky wezipeleriň hatarynda sebitiň üstaşyr geçirijilik mümkinçiligini iň ýokary derejede ulanmaga gönükdirilen energetika ulgamy we üstaşyr-ulag hyzmatdaşlygy barada durlup geçildi. Şeýle-de ministrler iki ýurduň sebitleriniň arasynda göni gatnaşyklary berkitmäge ýardam edýän serhetýaka hyzmatdaşlygyny höweslendirmegiň tarapdary bolup çykyş etdiler.

Medeni-ynsanperwer ulgam medeniýet, ylym we bilim ugurlary boýunça däp bolsn gatnaşyklary çuňlaşdyrmak nukdaýnazaryndan gözden geçirildi. Söhbetdeşler maglumat ulgamynda hyzmatdaşlygy giňeltmegiň möhümdigini nygtadylar. Saglygy goraýyş we sport ugurlary boýunça hyzmatdaşlygyň geljegi aýratyn bellenildi.

Gepleşikleriň möhüm temasy suw ulgamyndaky hyzmatdaşlyk we howanyň üýtgemegi baradaky meseleler boldy. Taraplar Araly halas etmegiň halkara gaznasynyň (AHHG) çägindäki özara hereketleri jikme-jik ara alyp maslahatlaşdylar we Hazar meselesi boýunça garaýyşlaryny beýan etdiler.

Duşuşygyň ahyrynda daşary syýasat edaralarynyň ýolbaşçylary sebitara hyzmatdaşlyk formatlarynyň çäginde köptaraplaýyn hyzmatdaşlygy has-da berkitmäge taýýardyklaryny tassykladylar.

Şeýle-de şu gün Türkmenistanyň Daşary işler ministrligi bilen Gazagystan Respublikasynyň Daşary işler ministrliginiň arasynda 2027-2028-nji ýyllar üçin hyzmatdaşlyk Maksatnamasyna gol çekmek dabarasy boldy. Bu resminama pudagara özara hereketleri ulgamlaşdyrmaga we hyzmatdaşlygyň esasy ugurlaryny berkitmäge gönükdirilendir.

Şeýle hem Gazagystan Respublikasynyň daşary işler ministrine Türkmenistanyň Prezidenti tarapyndan gol çekilen Gazagystan Respublikasynyň, Gyrgyz Respublikasynyň, Täjigistan Respublikasynyň, Türkmenistanyň we Özbegistan Respublikasynyň arasyndaky XXI asyrda Merkezi Aziýany ösdürmek maksady bilen dostluk, goňşuçylyk we hyzmatdaşlyk hakyndaky Şertnamanyň asyl nusgasy resmi taýdan gowşuryldy.