ABŞ-da, Kanadada we Meksikada geçirilýän 2026-njy ýyldaky futbol boýunça dünýä çempionatynyň toparçalaýyn tapgyrynyň 3-nji duşuşyklary tamamlandy. Şeýlelikde, pleý-off oýunlarynyň ilkinji tapgyryna gatnaşjak ähli ýygyndylar belli boldy. 1/16 finala iň soňkularyň hatarynda Horwatiýanyň, Gananyň, Kongo Demokratik Respublikasynyň we Alžiriň milli ýygyndylary çykmagy başardy.

L toparça. Angliýanyň ýygyndysy Panamany 2:0 hasaby bilen ynamly ýeňip, 7 utuk bilen toparçada birinji orny eýeledi. Horwatiýa Filadelfiýada geçirilen dartgynly duşuşykda Ganany 2:1 hasabynda ýeňip, 6 utuk bilen ikinji orny eýeledi. Gana ýeňlen hem bolsa, 4 utuk toplap, üçünji ýerden pleý-off oýunlaryna çykdy.

K toparça. Kolumbiýa bilen Portugaliýanyň arasynda Maýamide geçirilen duşuşykda ýeňiji kesgitlenmedi – 0:0. Kolumbiýa 7 utuk bilen toparçada birinji, Portugaliýa bolsa 5 utuk bilen ikinji orny eýeledi. Kongo DR Özbegistany 3:1 hasabynda ýeňip, 4 utuk bilen üçünji boldy we taryhynda ilkinji gezek dünýä çempionatynyň pleý-off tapgyryna çykdy. Özbegistanyň ýygyndysy üç duşuşygyň hemmesinde ýeňlip, ýaryşy tamamlady.

J toparça. Argentina Arlington şäherinde Iordaniýany 3:1 hasabynda ýeňdi. Dünýä çempionlarynyň düzüminde Lo Çelso, Lautaro Martines (11 metrlik jerime urgusyndan) we Lionel Messi tapawutlandy. Iordaniýanyň ýeke-täk pökgüsini Al-Tamari geçirdi. Şol bir wagtda geçirilen beýleki duşuşykda Awstriýa bilen Alžir özara 3:3 hasabynda deňme-deň oýnady. Argentina iň ýokary görkezijä — 9 utuga eýe bolup toparçada birinji orny eýeledi. Awstriýa bilen Alžir 4 utuk toplap, degişlilikde ikinji we üçünji orunlary eýelediler hem-de ikisi-de pleý-off tapgyra çykdy. Iordaniýa bolsa ýaryşy ýeňişsiz tamamlady.

2026-njy ýyldaky futbol boýunça dünýä çempionaty ABŞ-da, Kanadada we Meksikada rekord derejedäki 48 milli ýygyndynyň gatnaşmagynda geçirilýär. Pleý-off tapgyryna her toparçadan ilkinji iki orun eýelän ýygyndylar, şeýle-de üçünji ýerleri eýelän sekiz iň gowy topar çykdy. Dünýäniň häzirki çempiony Argentinanyň milli ýygyndysydyr.